Haatuf News

Home | Contact Us | Links |  Archives

 ISSUE 2572

Sarkaal Sare Oo Ka Tirsan UDUB Oo Sheegay In Xukuumadda Siillaanyo Hayso Dhabihii Rajiimkii Siyaad Barre

“Waxaan U Arkaa Qoraalkaa Siyaasad Cusub Oo Xukuumadda Ku Soo Korodhay, Waa Inay Cadayso Gooni Isku Taagii S/Land Ee Muqadaska Ahaa Laga Noqday” Guddoomiyaha UDUB Ee Komishanka Kanadiid Khaawi

Hargeysa, January 27, 2011 (Haatuf)- Guddoomiayaha UDUB ee Komishanka doorashooyinka Kanadiid Maxamed Khaawi aya xukuumada madaxweyne Siillaanyo ku eedeeyay inay hayso dhabadii rajiimkii Siyaad Barre uu ku xidhi xidhi jiray muwaadiniinta, ugana digay xadhiga iyo cabudhinta ay ku hayso Saxaafada xorta ah iyo madaxdhaqameedyada, uguna baaqay in si dhakhso ah ay xoriyadooda ugu soo celiso Tifaftiraha Waaheen Maxamuud Cabdi Jaamac (Xuuto) iyo Boqor Raabi Yuusuf C/laahi oo ku xidhan xabsiga weyn ee magaalada Hargeysa, kaas oo uu ku tilmaamay hab dhaqanada ay caanka ku yihiin kaligii taliyayaashu.

Waxa kale oo uu Guddoomiyaha xisbiga UDUB u qaabilsan Komishanka doorashooyinka Kanadiid Maxamed Khaawi khiyaamo qaran ku tilmaamay  qoraal uu Saxaafada qaarkood uu ku soo saaray xoghayaha Komishanka ADIS-ka C/kariim Axmed Xinif oo sheegay  in  hogaankii SNM ee dalka xoreeyay ay jabhadihii USC ee uu hogaaminayay Gen. Maxamed Faarax Caydiid iyo jabhadii SPM ee uu hogaaminayay Axmed Cumar Jees ay heshiis kula galeen in marka Siyaad Barre xukunka laga tuuro Somalia loo dhiso dawlad loo dhan yahay oo la isla ogolyahay uu ahaa heshiishkaasi mid SNM oo dhami isla ogayd, kaas oo uu ku tilmaamay mid khiyaamo qaran xambaarsan oo khilaafsan gooni isku taagi Somaliland, uguna baaqay xukuumadda Siillaanyo inay jawaab cad ka bixiso qoraalkaa ka soo baxay xoghayahaasi.Kanadiid  Khaawi  waxa uu sidaa ku sheegay mar uu xalay khadka Telefoonka kula soo xidhiidhay wargeyska Haatuf ,ayaa sidoo kale xukuumada ugu baaqay inay Ixtiraamto nidaamkii Dimuquraadiga ee lagu soo doortay, kana baydho hab dhaqanadii rajiimkii Siyaad Barre ee dalkii Somalia ku burburay, isagoo arrimahaas ka hadlayana waxa uu yidhi “Saxaafada madaxbanaanideedu waa lama tabtaan oo Distoorka ayay ku cadahay, iyada oo Saxaafada Somaliland ay leedahay Xeer Saxafadeed oo la ansixiyay ayaa waxa la yaab leh Tifaftiraha Waaheen Maxamuud Cabdi Jaamac (Xuuto) ee xabsiga weyn ee caasimada loo dhaadhiciyay Xeerka ciqaabta ee lagu qaaday, iyadoo Xeer Saxafadeed dalka u yaalo, xukuumadana waxa looga baahnaa maadaama lagu soo doortay hanaan Dimuquraadiya in Saxaafada xornimadeeda tixgaliso oo shuruucda dalka u yaala ay u hogaansanto tacdigana ka days, laakiin markaad eegto sida loola dhaqmayo Saxaafadii ama madaxdhaqameedyo ha noqotee ama mushtamaca kale ee aragtoyahooda ku saluuga talaabooyinka ay qaadayso xukuumadii ayaa waxay u muuqataa, in xukuumadda Kulmiye ay ku socoto dariiqii ay xukuumaddii Siyaad Barre ay dalka ku baabisay, taasina waxay keeni kartaa in kala dan baynta, nidaamka sharci iyo Dimuquraadiyadeed ee aynu haysanaa u burburo. Sidaa darteed waxaan xukuumadda ugu baaqayaa in Suxufigaasi Waaheen Xuuto iyo Boqor Raabi ay xoriyadooda u soo celiso, iyadoo tix galinaysa Dimuqraadiyadii xilka loogu soo doortay, xisbiga Kulmiye iyo hogaankiisu xiligii ay Mucaaridka ahaayeen marka la xidho madaxdhaqameedyo ama Suxufiyiin Kulmiye ayaa si weyn uga hadli jiray una camraarayn jiray, haddase waxaad moodaa in xogaankii Kulmiye iyo xukuumaddu ay si toos ah iskugu raaceen xadhiga Saxaafada, taas oo keeni karta khatar weyn, oo haddii xisbiga Kulmiye iyo xukuumaddiisii ay isku raaceen xadhiga iyo cabudhinta Saxaafada iyo madaxdhaqameedyada , waxaana Nasiib daro ah in xukuumadda Kulmiye ay muddo gaaban ku cabudhinayso wargaysyadii dalka oo ay soo dacweynayaan masuuliyiintii xukuumaddu. Muddadii ay dalka madaxweynayaasha ka ahaayeen C/raxmaan Axmed Cali, Maxamed Xaaji Ibraahim Cigaal Alle ha u Naxariistee iyo Daahir Rayaale Kaahin, Saxaafadu imtaaba dhaliilaha maamuladaasi horeba wey u soo bandhigi jiree, waxaad se moodaa, in xukuumadda Kulmiye ay u jilicsan tahay wararka ay Saxaafadu baahinayso, oo wargeyskii dhaliilo soo ban dhigaba la leeyahay ha la xidho xukuumadduu aflagaadeeyaye, taasina waa hab dhaqanada kali taliyayaashu ku kacaan, mana filayo in muddadii lixda bilood ahayd ee xukuumaddani jirtay in wax xun laga sheegay, balse waxaan qabaa in xukuumaddihii hore sidii wax looga sheegi jiray aan looga sheegin, taas darteed waa in xukuumadu Ixtiraamto madaxbanaanida Saxaafada”.        Mar aanu weydiinay sida ay xisbi ahaan u arkaan qoraalka Saxaafada ku soo baxay ee u soo saaray  Mr. Xinif  ee ku sheegay in hogaankii ururkii SNM  heshiis kula galay jabhadii USC iyo SPM xiligii lagu jiray halgankii dib u xoraynta dalka in marka Siyaad Barre xukunka laga tuuro Somalia loo dhiso dawlad loo dhan yahay iyo in Ictiraafka Somaliland ku xidhan yahay wada hadalo lala galo Somalia, isagoo arinkaa ka hadlayana waxa uu yidh  “Anigu maba arko Somalia lala hadlayaa meel ay joogto, haddii qaar ka mid ah shaqaalaha xukuumadda ay ka soo yeedhay waxaan u arkaa inay tahay siyaasad cusub oo xukuumadda ku soo korodhay oo ay leedahay shaqaalaheeda dadka sii dareen siiya, haddiise la leeyahay wada hadal ha lala galo gooni isutaagii Somaliland ee muqadaska ahaa ee la gaadhay 1991-kii ma waxbaa iska badalay  mise Distoorkii qaranka ayaa la badalay, bal ummada ha loo sheego shakibay keentaye, qoraalka Xinif waxaan u arkaa mid xambaarsan khiyaamo qaran,  waana in xukuumaddu jawaab cad ka bixisaa mawqifka ay ka taagan tahay qoraalkaasi”.

Dhinaca kale qoraalkan ka soo baxay C/kariim Xinif ee uu ku sheegay in hogaankii SNM ay jabhadihii USC iyo SPM ee Somalia ay heshiis kula galeen in dawlad loo dhan yahay ay Somalia ka wada dhisaan ayaa shacbiga reer Somaliland ee ku kala dhaqan dalka dibadiisa iyo gudihiisu ay dareemo shaki leh ka muujiyeen dhawaaqaasi ka soo baxay Mr. Xinif, iyadoo sidoo kalena wararku intaa ku darayaan in golayaasha Baarlamaanka iyo axsaabta Mucaaridkuna UDUB iyo UCID ay si weyn uga biyo diidan  yihiin, isla markaana la sheegay in maalinta barito ay xisbiyada Mucaaridku  ay si wada jir ah uga soo saari doonaan mawqifka ay kataagan yihiin.