Haatuf News

“Xukuumadan Siilaanyo Iyadaa U Ogolaatay Wasiirka Khaarajiga Somalia Inay Ka Soo Degto Berbera, Iyagaana London Iyo Abu-Dabay Kula Kulmay Oo Itijaahii Gooni Isku Taaga Badalay”

Hargeysa, January 22, 2013 (Haatuf) – Xoghayaha guud ee guddiga arrimaha gudaha golaha wakiilada Cabdiraxmaan Maxamed Jaamac (Xoog) ayaa sheegay in xukuumada Madaxweyne Axmed Maxamed Maxamuud Siilaanyo ay wasiirka arrimaha dibada Somalia marwo Foosiya Yuusuf Xaaji Aadan ay u ogolaatay inay ka soo degto madaarka Berbera ee gobolka Saaxil, waxaanu tilmaamay in masuuliyiinta dawlada Somalia ay xukuumada Somaliland kulamo kula yeelato dalka UK iyo Imaaraadka Carabta. Md Cabdiraxmaan Xoog ayaa waxa uu beeniyey in kulam ay dhawaan ku yeesheen wasiirka arrimaha dibada Somalia Foosiya Yuusuf xaaji Aadan aanau ahayn kulan u qorshaysna labadooda, balse ay si kadis ah ugu kulmeen madaarka Berbera.

Md Cabdiraxmaan Xoog waxa uu sidaasi ku sheegay mar uu shalay Haatuf uga waramayay war kusoo baxay cadadkii shalay ee wargeyska oo cinwaankiisu ahaa xildhibaan Xoog iyo masuuliyiin kale oo si qarsoodiya ula shaqeeya dawlada Somalia, isaga oo ka hadlaya arrinkaasina waxa uu yidhi “Anagu hadaanu nahay golaha wakiilada waxaanu saxaafada ka difaacna in xukuumadu u samayso xeer ciqaabeed, waxaydinse imika nagu riixaysaan in xeerkii ciqaabta aanu taageerno, inta aydaan wax qorin waxna waydiiya.11-kii January 2013 diyaaradaasi maba timaado, maalinta aan madaarka Berbera tagayna been baad ka sheegteen, waxaanan ugu tagay madaarka Dr Abiib iyo rag la socda oo dalka u yimid mashaariic Riigag iyo xoolo naaxinta Somaliland, anagu wasiirka arrimaha dibada Somalia marwo Foosiya Yuusuf xaaji Aadan madaarka Berbera kumaanu balamin, waan salaamay oo labaatan daqiiana maanu wada hadale waxaan ku idhi wasiir ma qadaynaysaa, ilayn waa gabadh aanu isku jifo nahay, waxay igu tidhi waar ma qadaynayee waan daalanahay, Transit-kana xukuumadan Siilaanyo iyadaa u ogolaatay, iyagaa masuuliyiinta dawlada Somalia la kulma oo itijaahii siyaasadeed ee Somaliland badalay, oo London iyo Abu-dabay kula kulma, iyagaana ku yidhi madaarka Berbera soo mar oo u ogolaaday, warkaasina wa mid been ah oo aan sal iyo raad toona lahayn, intaydaan warkaasi soo qorin waxay ahayd inaydin wax iga waydiisaan oo aad ii timaadaan, kulan aanu ugu balansanayn wasiir Foosiyana Airport-ka Berbera muu jirin, waanan ka xumahay in wargeyska Haatuf oo aanu xidhiidh wanaagsan leenahay oo ka soo jeeda gobolka Hargeysa ee layga soo doortay ee aan xildhibaanka u ahay inuu iga qoro war aan jirin, wasiiro Somalia xil looga magacabay ayaa qaar yidhaahdaan xisbiga Kulmiye ayaa igula sii balamay in xil la iiga magacaabo Somalia, xukuumada Siilaanyana waxba yaanay qiiqa isku qarinin iyadaa laga hayaa Alif wax ma leh iyo waxbuu leeyahay, oo nagu tidhi wada hadalada Somalia noo fasaxa golayaaloow, oo ummaduna la yaaban tahay, wasiiradeediina ninba af gaar ah uu ku hadlayo, hadal iyo murti xukuumadan Siilaanyo waa Hasha Geella cunta ee hadana cabaada”