|
|
Xukuumadda Siilaanyo Oo Xidh-Xidhay Muwaadiniin
Basaskooda Ku Dhajiyey Istiikaro Ay Ku Xardhan
Yihiin “Free Haatuf And Hubaal”
Hargeysa, April 30, 2014 (Haatuf) – Xukuumadda Siilaanyo ayaa qaaday
talaabadii ugu danbaysay ee ay ku cabudhinayso xoriyatul-qawlka ka dib
markii ay maanta sifo sharciga baalmarsan u xidh-xidhay muwaadiniin
basaskooda ku dhajiyey Istiikaro ay ku xardhan yihiin Free Haatuf and
Hubaal, kuwaas oo baabuurtaas iyo ragii wadayba xabsiga ay u taxaabeen
ciidamo Bilays ahi.
Sida ay Haatuf u xaqiijiyeen saraakiil ka tirsan saldhiga dhexe ee
magaalada Hargeysa ayaa waxa ku jira muwaadin magaciisa la yidhaahdo
Qorane Yuusuf Cawaale ayaa isaga iyo baskiisaba ay ku xidhan yihiin
halkaasi, isla markaana aan ilaa imika si dhab ah loo garaynin cida
amartay xadhiga baabuurkaas lagu xabisay Istiikarka uu ku taageerayo
Xoriyatul-qawlka.
Dhinaca kale talaabadan ay maanta qaaday xukuumadda Siilaanyo ayaa
noqonaysa mid muujinaysa in heerkii ugu xumaa ay la marayso
Xoriyatul-qawlkii dalka, iyada oo aanay wali dalka hore uga dhicin in la
isku xidh-xidho afkaartii uu muwaadiniinta u ogolaaday Distuurka
Somaliland, isla markaana dhacdooyinkii Wadanka ka dhacay Saddexdii Sano
iyo badhkii ay xukuumadda xisbiga Kulmiye talada dalka haysay ayaa waxa
dalka ka dhacay tacadiyadii, gabood-faladii iyo xad-gudub-yadii ugu
badnaa mudadii ay Somaliland jirtay. |