Hulka Sare Ee Qasriga Madaxtooyada
Oo Durtaba Weerar Ku Bilaabay Maxamed
Biixi Yoonis
Wargeyska
Somaliland Today ee ku hadla afka hulka sare ee Madaxtooyada Somaliland
ayaa cadadkiisii maanta (30/4/2014) waxa durtaba lagu soo qoray maqaal
si ba’an loogu weerarayo wasiirka Arimaha Dibada Somaliland Maxamed
Biixi Yoonis.
Maqaalkan oo laga dhigay sidii ra’yi qof soo qoray (Cabdisalaam Dharaar
Cilmi telephone Lr 063442860) laakiin se ay ka muuqato fartii Baashe
Cawil iyo wasiirka Macdanta Xuseen Cabdi Ducaale (Waji-xun) ayaa waxa
wasiirka Khaarajiga Maxamed Biixi Yoonis lagu tilmaamay dilaal usoo
shaqo tagay inuu Somaliland ka urursado lacag uu ku galo doorashada
madaxtinimada dalka.
Waxa kale oo uu maqaalku Maxamed Biixi Yoonis ku eedeeyey inuu faragalin
ku hayo wasaaradaha kale inkastoo aanu maqaalku magacaabin wasaaradahaas.
Weerarkan cayda iyo aflagaadada isugu jira ee uu wiilka Madaxweynuhu
sodoga u yahay iyo wasiirka Macdanta Xuseen Cabdi Ducaale (Waji-xun) ay
ku soo qaadeen wasiirka Arimaha Dibada waxa food-saare looga dhigay
sidii oo laga cadhaysan yahay lagana soo horjeedo mashruuc ay
yidhaahdeen waxa watay Mr Biixi oo doonayey inuu dekeda Berbera ku
wareejiyo dalka Djibouti.
Eedaha kale ee maqaalkani uu dusha ka saarayo Maxamed Biixi waxa ka mid
ah in mashruucan ay kula shuraako yihiin niman kale oo ay ka mid yihiin
nin la yidhaahdo Axmed Maxamed Abakor oo ay ku tilmaameen inuu shariig
la yahay madaxweynaha Djibouti.
Isla cadadkii maanta Arbacadii ee Somaliland Today waxa ku qornaa
waraysi dheer oo uu wargeysku sheegay in idaacad afka Al-shabaab ku
hadashaa ay la yeelatay wadaad reer Somaliland ah oo la yidhaahdo Sheekh
Maxamuud Cabdilaahi Geelle oo u badnaa borobogaandhe shacbiga Somaliland
lagula colaysiinayo Ethiopia.
Hadaba garanay in hulka sare ee Madaxtooyada lagaga kacsan yahay Maxamed
Biixi Yoonis waxa se is-weydiin leh sababta keentay iyo cida ka dambaysa
weeraradan la soo mariyey wargeyska Somaliland Today ee loola badheedhay labada dal ee aynu jaarka nahay.
Shaki kuma jiro in Baashe Cawil iyo Wasiirka Macdanta Xuseen Waji-xun ay
baryahanba wasiirka Arimaha Dibada ku dhaleecaynayeen inuu faragalin ku
wado wasaarada Macdanta oo uu xogta siiyo wargeyska Haatuf.
Sida todobaadkii hore lagu baahiyey website-ka Haatuf, Baashe Cawil iyo
Xuseen Waji-xun waxay ilaa horaantii bishan April olole ugu jireen sidii
uu wasiirka Arimaha Dibadu isaga casili lahaa jagadiisa iyagoo ka baqaya
in uu Mr Biixi wax ka ogaado sirahooda sida macaamilka u dhexeeya
wasiirka Macdanta iyo shirkadaha shidaal baadhista ee heshiisyada kula
jira wasaaradiisa.
Wali lama garan karo sababta ay Baashe iyo Wasiirka Macdantu weerarkooda
ugu ekaysiin waayeen Maxamed Biixi Yoonis ee ay aflagaadadooda ula
talaabeen dhinaca Djibouti iyo Madaxweynaheeda Ismaaciil Cumar Geelle.
Hase yeeshee maaha markii u horaysay ee ay iska maagaan Madaxweynaha
Djibouti ama kula galgashaan arin aan isaga khusayn ama loo aanayn
karinba iyadoo maqaal
af-Ingiriisi ah oo uu Baashe Cawil ku soo qoray Website-ka Somalilandsun
29 March 2014 ciwaankiisuna ahaa “A Traitor Amidst Us”, uu Madaxweynaha
Djibouti ku masabiday inuu yahay qofka Yuusuf Cabdi Gaboobe u iibiyey
gaadhiga Hummer-ka ah ee uu ku dhex wato magaalada Hargeysa.
Sida maqaalkan maanta ee lagu caayayay Maxamed Biixi Yoonis ayaa Baashe
maqaalkaa af-Ingiriisiga ahaa ku soo saxeexay magac kale oo ahaa Siciid
D. Balbal oo Mombasa jooga iyadoo uu Baashe xiligaa ku sugnaa goobta
dalxiiska loo tago ee Naivasha oo ku taala Nairobi duleedkeeda.
Sidoo kale ma cada sababta iyadana uu Wargeyska Somaliland Today u
maagayo dawlada Ethiopia.
Hase yeeshee waxa loo badinayaa in Baashe Cawil iyo Xuseen Waji-xun ay u
kaseen carqaladaynta xidhiidhka Somaliland iyo labada dal ee ay jaarka
yihiin iyaga oo ku xumaynaya wasiirka Arrimaha Dibada hadaanay kaba
ahayn sidii taladii Qalbooblay Somaliland dhinac walba ka soo awda
sidaasay idiinku badin doontaaye.
F.G. Waxa fiiro gaar ah mudan telefoonka oo hal lambar ka dhiman
yahay, Iyo magacyada Dharaar iyo Balbal ee ku kala saxeexan labada
maqaal ee kor ku tilmaaman. |