|
|
Madaxwayne Siilaanyo
Oo Hor-Imankari Waayey Warbaahinta, Cajalad Laga Soo Duubay Ku Sheegay
Inuu Musharax Yahay, Fariin Adagna U Diray Guddoomiyaha Kulmiye
“Umma
Dulqaadanayo Mana Aqbalayo Cidna……., Waxaan Ku Qaban Doonaa Gacan Adag,
Ma Nihin Kuwii Shaanida Lagu Baqo Gelinlahaa, Sharciguna Wuxuu I Siiyey
Labo Jeer (Two Terms), Ma Dhacdo Xisbi Xaakin Guulaystay Oo Xisbigiisu
La Tartamaa” Axmed Siilaanyo
Hargeysa, May 31, 2014 (Haatuf) – Madaxwayne Siilaanyo ayaa tahli-kari
waayey inuu hor yimaado warbaahinta oo uu qabto shirjaraa’id oo uu kaga
hadlayo xaalada murugsan ee dalku galay, kaas oo cajalad laga soo duubay
Maanta loogu yeedhay warbaahinta inay baahiyaan, balse saxafiyiintii
madaxtooyada galay oo u badnaa kuwa ka hawlgala Telefishanada ay ka biyo
diideen dhaqankaasi, kuwaas oo ku dooday inay arintaasi ka hor imanayso
shuruucda caalamiga ah ee warbaahinta dunida.
Madaxwayne Siilaanyo ayaa cajaladaha laga soo duubay ku sheegay inuu u
tartami doono musharaxnimada madaxwayne-nimo ee xisbiga Kulmiye ee
shanta sano ee danbe, kaas oo ku dooday in sharciga dalku uu kooto ugu
xidhayo maadaama oo xisbul-xaakimkii uu talada dalka hayo inaanay cidi
kula loolami karin, balse uu isagu diyaar u yahay in lala tartamo.
Axmed Siilaanyo ayaa waxa uu fariin adag u diray guddoomiyaha Kulmiye
Muuse Biixi Cabdi oo ay mudo dheer rafiiq ku ahaayeen siyaasada, kaas oo
uu ku dooday inaanay jirin meel uu Muuse Biixi ugu balanqaaday inaanu
doorashada shanta sano ee danbe u tartamaynin.
Madaxwayne Siilaanyo waxa uu sidoo kale si adag uga hadlay laba qarax oo
habeenadii ina dhaafay ka dhacay magaaladda Hargeysa, kuwaas oo uu ku
faanay inaan isaga lagu baqo-galinkarin. Ugu horayna isaga oo
arrimahaasi ka hadlaya, waxa uu hadalkiisa ku bilaabay “Dhamaan waxaan
salaamayaa bulshada Somaliland gudo iyo debedba, waxaan jecelahay in aan
wax ka idhaahdo labo shay oo inagu cusub, kuwaas oo ah: A) Amaanka, iyo
Qaraxyada inagu soo kordhay.
B) Khilaafka Xisbiga Kulmiye.Nabadgelyadu waa shay ku qaaliya umada reer
Somaliland, waxay usoo mareen dariiq dheer, waxaynu umad ahaan ku
difaacnaa inagoo isku duuban, waxaynu feejigo u lahayn, oo iska illaali
naynay, cadaw meel fog inooga yimaada, waxaase ayaan daro ah, in kuwii
aan ammaanka u diray iyo kuwii damaca lahaa, ee dalkan inay xukumaan
doonayey, laga soo sheego waxyaalo ammaanka kulidi ah, iyo inay isku
dayaan in ay qarankan khalkhal geliyaan.
Waxaan leeyahay qarankan anigaa masuuliyada 1-aad iga saarantahay, umma
dulqaadanayo mana aqbalayo cidna gorgortan kala gelimaayo ammaanka iyo
xasiloonida dalka. Waxaan ku qaban doonaa gacan adag, waxaan la tiigsan
doonaa sharciga, aniga iyo shacbiguba ma nihin kuwii Shaanida lagu baqo
gelinlahaa.
Madaxwaynuhu isaga oo hadalkiisa sii wata, waxa uu intaas raaciyey
“Waxaa maalmahan soo baxayey khilaaf xisbiga Kulmiye dhexdiisa ah, waan
ka xumahay manaan filayn wakhtigan oo waxaan u haystay in aan kala
reebay intii is haysay, oo weliba guddi turxaan-bixineed u saaray,
taasoo suurta gelisay in shirwaynihii loo soo gebagebeeyo si quruxbadan.
waxaana halkaa lagu doortay shirgudoonkii maamulayey shirka, Hogaankii
Xisbiga iyadoo laysla qaatay in Golihii dhexe iyo fulintii lagu soo
ururiyo shirgudoonka shirka, Waa lagu soo ururiyey waanay soo saareen.
Hadiiba uu soo baxo is-fahmi-waa, waxay ahayd in si hoose loo dhameeyo,
hogaanka xisbigu wadafadhiisto, Kaadirka xisbiga loo yeedho,
Xildhibaanada la talogeliyo, hadiii taasi dhamayn waayaan xisbigu sharci
buu leeyahay dalkuna sharci buu leeyahay. buuq iyo qaylo toona looma
baahnayn”.
Axmed Siilaanyo mar uu ka hadlayey khilaafka Kulmiye, waxa uu yidhi
“Arinta Musharaxnimada madaxweynaha ee xisbiga kulmiye ma jirto balan
noo dhaxaysay aniga iyo Muuse Biixi habayaraatee, waxaa jirtay oo golaha
dhexe soo saaray inaan gudoomiyaha ku wareejiyo marka aan ku guulaysto
tartanka doorashada madaxweynaha, waxaanan ku wareejiyey bil-gudaheed”.
Isaga oo Siilaanyo hadalkiisa sii wata isla markaana sheegaya inuu mar
kale isu soo taagi doono Doorashada Madaxtinimada ee la filayo in ay
qabsoonto sanadka 2015, waxa uu yidhi “Waxaa Xisbigu ii doortay
musharaxa madaxweynaha waanan ku guulaystay sharciguna wuxuu i siiyey
labo jeer (Two Terms), waan sharaxanahay diyaarbaan u ahay cidkasta oo
illa tartanta, waxay ahaan jirtay dabeecada nidaamka dimuqraadiyadu in
la tartamo balse ma dhacdo xisbi xaakin guulaystay oo xisbigiisu la
tartamaa. Aniguse waxba kamaqabo”. Madaxwayne Siilaanyo isaga oo ka
hadlaya dhexdhexaadka golaha guurtida ee khilaafka Kulmiye, waxa uu
yidhi “Odayaasha Guurtida waa kumahadsanyihin dedaalka, qiimo wayna waan
u hayaa, xaasha ma diidin mana diidikaro oo waxaan ahay ninkii 80 cod ay
kaga kexeeyeen duco-qaado balse arintani waxay u baahantahay in xisbiga
gudihiisa iyo sharcigiisa lagu daweeyo”. |