|
|
Axmed Siilaanyo Iyo Muuse Biixi Oo
Dareeno Kala Durugsan
Ka Yidhi Go’aamadda Laga Soo Saaray
Xiisadii Ka Dhex-Taagnayd Kulmiye
Hargeys, June 7, 2014(Haatuf) – Guddoomiyaha
Xisbul-xaakimka dalka ee Kulmiye Muuse Biixi Cabdi iyo madaxwayne
Siilaanyo ayaa dareeno kala durugsan ka yidhi saddexda qodob ee laga soo
saaray khilaafkii u dhexeeyey.
Guddoomiyaha Kulmiye Muuse Biixi ayaa isagoo ka hadlaya xarunta
madaxtooyada oo maanta lagaga dhawaaqay go’aamada ay khilaafkaasi ka soo
saareen guddidii golaha guurtida waxa uu sheegay inaanay go’aamadaasi
ahayn kuwo cadaalada ku salaysan, balse uu dulmi walba uu ugu
dulqaadanayo danta bulshadda Somaliland darteed, kaas oo sheegay inuu ku
qanacsan yahay saddexda qodob ee u xaglinaya Madaxwayne Axmed Siilaanyo.
Sidoo kale Madaxwayne Siilaanyo ayaa isaguna isagoo dhoola-cadaynaya
sheegay inuu ku qanacsan yahay go’aamadaasi oo uu ku dooday inay soo
afjarayaan khilaafka xisbiga Kulmiye u kala jabiyey labada garab. Ugu
horayna Guddoomiye Biixi oo arrimahaasi hadlaya,waxa uu yidhi "Waxa ay
ila tahay hadaad raga aad arin u dhiibato maaha sidaad doonayso in ay
kuu xukumaan inkasta oo ay adag tahay sida ay wax u jareen hadana waan
aqbalay,Go'aamada waan aqbalay sida ay ahaayeen si kasta ha iigu adkaato
danta qaranka ayaan u aqbalayaa aniga waxba layma soo qaadinee sidii
kalay u xukumeen waan se qaatay".
Dhinaca kale Madaxweyne Siilaanyo ayaa isaguna ka hadlay sida uu u arko
go’aamadaasi oo isaga dani ugu jirto, waxa uu yidhi
"Waanu aqbalnay oo waanu qaadanay,waxaanu u aragnaa sida ay tahay oo
waxa ay tahayba waanu qaadanay oo waanu aqbalnay maadaama aanu gudida
aqbalnay in ay dhexdhexaadin gasho oo ay Guurtidii Qaranka ay tahay". |