|
Dhagaysiga Dacwada Xukuumadu
U Haysato Haatuf Oo Hada Ka Bilaabantay
Maxkamada G/Hargeysa
Iyo Xukunkii Lagu Ridi Lahaa Masuuliyiinta
Wargeyskaasi Oo La Sii Diyaariyey
Hargeysa, June 19, 2014 (Haatuf) - Dhagaysiga dacwada xukuumada madaxweyne
Siilaanyo ku soo oogtay gudoomiyaha Haatuf Yuusuf Cabdi Gaboobe iyo
Tifaftiraha wargeyskaasi Axmed Cali Cige ayaa hada ka socdaa
Maxkamada gobolka Hargeysa kadib markii xalay fiidkii gudoomiyaha
wargeyskaasi oo ku xidhnaa xabsiga Gabilay laga soo qaaday lana keenay
Xabsiga Hargeysa iyadoo isla saakana la keenay Maxkamada Gobolka
Hargeysa oo dacwadu ka bilaabantay.
Xukunka dacwadan ayay xukuumada, Xeer-ilaalinta iyo gudoomiyaha
maxkamada gobolka Hargeysa Faysal Dhago-dhago ka sii shaqeeyeen iyadoo
garsooraha dacwadan qaadaya ee
Asad Nuur Cilmi oo masuuliyiinta Haatuf ay dhawr goor dureen
dhexdhexaadnimadiisa iyo in laga badalo ayaa loo dhiibay fayl diyaarsan
oo duuduub loogu xukumayo masuuliyiintaasi Haatuf, waxaana xusid mudan in
Maxkamada aanay ka soo xaadiri doonin qareenada difaacaya masuuliyiinta Haatuf
maadaama oo la iska dhago tiray codsiyo ay ku dalbadeen in garsooraha laga badalo, kiiskana lagu
dabaqo xeerka saxaafada Somaliland halka loo adeegsanayo kiiskan xeerka
ciqaabta guud ee Somalia.
dhagaysiga dacwadan ayaa noqonaysa tii saddexaad ee ka dhacda maxkamada gobolka
Hargeysa oo ay dhibaneyaal ka yihiin labada wasiir ee Cali Warancade,
Xuseen Cabdi Ducaale (Waji-xun) iyo wiilka uu madaxweyne Siilaanyo sodoga u yahay ee
Baashe Cawil kuwaas iyagu ku eedeeyey labada masuul ee Wargeyska Haatuf
inay ka baahiyeen warar been abuur iyo meel ka dhac ah, waxaana la
filayaa in sidii labadii dhagaysi ee hore uu hanaanka maxkamada iyo
cadaaladu u socdo dhinac qudha oo garab siinaya wasiirada iyo wiilka uu
sodoga u yahay Madaxweyne Siilaanyo ee Baashe Xidid-ku-xoolow.
Hadaba waxa aanu idiin soo gudbin doonaa wixii warar ah ee ku saabsan
dhagaysiga maxkamada ee kiiskan loo haysto masuuliyiinta Haatuf anagoo
idiinku soo daabici doona bogga internetka aanu ku leenahay ee
Haatuf.net iyo Facebooka account-ka Haatuf ee Haatuf newspaper. |