|
|
|
Baarlamaanka Oo Sheegay Inay U Yeedhi Doonaan
Xeer-ilaaliyaha Qaranka Si Ay Wax
Uga Waydiiyaan Sababta Garsoorku Ugu Dhaqmi Waayeen Xeerka Saxaafada Ee
Ay Ansixiyeen
“Cida Sharciga Dalka Ku Tumataa Waa Cid Nabadgalyada
Dalka Ku Tumatay” Rayte
Hargeysa, June 23, 2014 (Haatuf) - Xildhibaano ka tirsan golaha
Baarlamaanka Somaliland ayaa sheegay inay u yeedhi doonaan xeer-ilaaliya
guud ee qaranka si ay wax uga waydiiyaan asbaabaha ay keenay in
hay’adaha garsoorku ilaa hada aanay ku dhaqmin xeerka saxaafada ee
golayaasha Baarlamaanka ee Wakiilada iyo Guurtidu ansixiyeen 2004-tii.
Xildhibaan Md Siciid Cilmi Rooble iyo xildhibaanada Bashiir Tukaale,
Maxamed Jaamac Rayte, Maxamed Aw Cali Shabeel iyo xildhibaano kale oo
shalay la hadlay saxaafada ayaa intaasi ku daray in Saxaafadu ay u
shaqayso shacabka oo ay wakiil ka tahay bulshada Somaliland, isla
markaana aan loo baahnayn tacadiyada lagu hayo maanta, waxaanay
tilmaameen in gole Baarlamaan ahaan ay ka warqabaan in xeerkii saxaafada
ee ay ansixiyeen golayaashooda wakiilada iyo guurtidu aan lagu dhaqmin
oo laga doorbiday xeerkii ciqaabta ee Somaliland waxaanay carabka ku
adkeeyeen oo ay soo jeediyeen in ay dhaqan galaan xeerarka dalka ee
ansaxa ah oo lagu dhaqmo xeerarka dalka gaar ahaan xeerka saxaafada
Somaliland.
Xildhibaan Maxamed Jaamac Rayte oo isaguna halkaasi ka hadlay ayaa waxa
uu yidhi “Cida sharciga dalka ku tumataa waa cid nabadgalyada dalka ku
tumatay dadkii nabadgalyada loo diray haday iyagu sharciga ku tumanayaan
waxaanu leenahay waxa ay noqonaysaa in xukuumadu markaa aanay ka
jawaabayn danigii shacabka”
Hadalkan xildhibaanada ayaa ku soo beegmay xilli ay xukuumada
madaxaweyne Siilaanyo xayiraad ku soo rogtay wargeysyada Haatuf iyo
Hubaal, isla markaana masuuliyiinta Haatuf Yuusuf Cabdi Gaboobe iyo
Axmed Cali Cige xabsiga loo taxaabay, xukunkoodana bari loo balansan
yahay in garsoorku ku rido xukun qarqoosh laga soo maleegay
Madaxtooyada. |