|
|
|
Hadaad Diiday
Inaad Noo Xil Qariso Waad Noo Xidhnaanaysaa
Faallo: Maxamed Cabdilcasiis Ciise,
freelance journalist
Xadhiga wargeyska
Haatuf iyo masuuliyiintiisa ee tuugii ay kashifeen wali xilka hayo oo uu
suuqa marayo iyagiina xidhay ayaa waxay sheekadani ka bilaabmaysaa in
markii uu wasiirka Macdanta Xuseen Cabdi Ducaale (Xuseen Waji-xun) iyo
qoyska madaxtooyadu ay sas ka qaadeen maqaalo ay soo daabaceen labada
wargeys ee Somaliland Times iyo Haatuf oo wax ka ifdiiminayey
musuqmaasuqa ku lingaxan heshiisyada shidaal baadhista oo magac ahaan ah
heshiisyo ay dawlada Somaliland la gasho shirkado ajnabi ah laakiinse
markay runta tagto ah heshiisyo ay si-gaar ah (privately) u maamushaan
wasiirka Xuseen Waji-xun iyo wiilka uu sodoga u yahay madaxweyne
Siilaanyo ee Baashe Cawil.
Sida laga war qabo Xuseen Waji-xun iyo Baashe Cawil waxa ay ugu
horayntii isku dayeen in masuuliyiinta Haatuf ay handidaado dadban u
diraan iyagoo u marinaya shakhsiyaad ku dhawdhaw qasriga Madaxtooyada
isla markaana ay aqoon isu leeyihiin madaxda Haatuf.
Ujeedada handidaadan waxay ahayd in wargeysku joojiyo qoraaladiisa uu ku
soo bandhigayo musuqmaasuqa hadheeyey arimaha shidaal baadhista ee dadka
reer Somaliland ka qarsoonayd taas oo yeelatay fal-celis (feedback) aan
ka farxin Xuseen Waji-xun iyo Baashe oo fariimihii handidaada waxa ka
dhashay wargeyskii oo ku sii dhiiraday soo saarista maqaaladii ay
dhibsanayeen.
Marwada koowaad Aamina Waris ayaa dabeeto qaaday talaabooyin ay kaga
aargoosanayso Haatuf iyadoo ku andacoonaysa in wargeysku fadeexadeeyey
inankeedii Baashe Cawil. Aamina Waris waxay xall mooday wargeyska oo
albaabada loo laabo.
Markay taasi waxba ka tari wayday mawqifkii Haatuf waxay noqotay in
websiteyadii labada wargeys lagu daro oo shirkadaha isgaadhsiinta laga
dalbado in laga xidho booqashadii. Waxa ku xigtay in masuuliyiintii
labada wargeys laga xayiro inay dalka dibada uga dhoofi karaan.
Markay halkaa marayso waxa la go’aansaday in maxkamad qarqoosh la furto
oo intay dacwadaasi socoto xadhig, jidh-dil iyo bahdilaad joogto ah
lagula dhaqmo Gudoomiyaha Haatuf iyo Tifaftiraha wargeyska waxaanay
xukuumadu arintan uga shirtay qaab qabiil iyadoo loo xil saaray
xeer-ilaaliye reerka ah oo la yidhaahdo Aadan Salaad Seed (Aadan Gudhuu)
kaas oo looga yeedhay Caynabo.
Aadan Gudhuu waxa ka amar qaadanayey garsoorihii dacwada qaadayey,
taliskii bileyska, hogaanada ciidamada SPU iyo RRU, CID-da iyo bileyska
maxkamadaha intaba, waxaanay arintu gaadhay heer uu xeer-ilaaliyahaasi
dadkii dhagaysigii khamiistii dhaweyd joogay maxkamada oo wada maqlaya
inuu Yuusuf Cabdi Gaboobe ku yidhaahdo “Cagta hoosteeda ayaan ku galin
doonaa ee waad is arki doontaa”.
Maalintii u horaysay ee ay labada masuul ee Haatuf maxkamada tageen oo
ahayd 4/5/2014 markii xeer-ilaaliyahan oo aanay hore u arag su’aaleen
halka uu ka socdo ayaa wuxuu ugu jawaabay iyadoo garsoore Asad Nuur
Cilmi oo dacwada mudaynayey maqlayo “Waxaan ahay kuwii aad wargeyskiina
ku caayayseen”.
Markii ay wax sii su’aaleenna ayaa waxa uu u sheegay inuu yahay ku
xigeenka xeer-ilaaliyaha guud ee qaranka, waxaana gudoommiyaha iyo
tifaftiraha Haatuf isu-qaban wayday hadalkiisan dambe iyo kiisii hore ee
uu ugu sheegayey in isaga iyo Xuseen Waji-xun, Baashe Cawil iyo Cali
Mareexaan ay isku hayb yihiin.
Hada markay maxkamadu ugu dhawaaqdo xadhig, xayiraad iyo ganaax intay
doonaanba ee Yuusuf Cabdi Gaboobe iyo Axmed Cali Cige-ba ku adkaystaan
halkoodii ahayd inaanay wax gorgortan ah ka galayn kana tanaasulayn
xoriyatal qawlka ay xaqa u leeyihiin iyo madaxbanaanida wargeyskooda ee
aynu ognahay mawqifka xukuumadan beelaysanina ahaa hadaad diideen inaad
noo xil qarisaan idinka iyo wargeyskiinu waad xidhnaanaysaan, su’aashu
waxay tahay hadaba arintani intaas ma ku ekaan doontaa mise xukuumada
Siilaanyo waxay la gali doontaa meelo kale oo aanay hada haabkaba ku
haynin?.
Inta la ogyahay Haatuf uma muuqato inay ka hadhi doonto wixii ku dhacay
oo xataa hadii uu madaxweyne Siilaanyo “cafis” ka soo saaro dambi aanu
masuuliyiinta wargeysku marka horeba galin waxay u badan tahay in
talaabadaasi aanay u cuntami doonin bahda Haatuf iyadoo ay jiraan
dhibaatooyin aanay masuuliyiinta Haatuf ilaa hadda ka hadal oo ay
sheegayaan in loo gaystay mudadii ay xidhnaayeen oo sababi karta in
Axmed Siilaanyo, Marwadiisa Aamina Waris, Wiilka ay sodoga u yihiin iyo madax kale oo ka tirsan dawlada lala
tiigsado dacwado iyo ashkatooyin caalami ah si loogala xisaabtamo
dambiyada ay masuuliyiinta Haatuf ka tirsanayaan. |