Home | Contact Us | Links | Archives |
ISSUE 3570 |
August 15 2014 Shuwaal 19,1435H |
|
|
Kulan Lagaga Arrinsanayo Xaaladda Dalka Iyo Shirwayne Ay Iskugu Imanayaan Beelaha Habar- Magaaddo Oo Maanta Ku Qabsoomay Hargeysa
Hargeysa, August 14, 2014 (Haatuf) – Kulan balaadhan oo ka mid ah shir-doceedyada ay beelaha Habar-Magaaddo kaga tashanayaan xaaladda dalku ku sugan yahay iyo shirwayne guud oo ay beelahaasi Magaaddo dalka gudihiisa ku qabsan doonaan oo baryahanba ay hadal-hayntiisu ku badnayd warbaahinta iyo goobaha bulshadu iskugu timaadaba ayaa maanta ka qabsoomay magaaladda Hargeysa. Kulankan oo ka dhacay Ambassador Hotel ayaa waxa iskugu yimid haldoorka beelaha Subeer-Awal iyo Garxajis ayaa waxa lagaga hadlay arrimo mihiim ah oo qaban-qaabada shirwaynaha ka sokow ay ka mid ahaayeen xaaladda dalku ku sugan yahay iyo sidii beelaha Habar-Magaaddo u yeelan lahaayeen iskaashi siyaasadeed oo waxtar u yeesha qaranimadda Somaliland iyo nabad-galyada dalkaba, iyadoo la isla qaatay in kulanka danbe lagu marti-qaado labada beelood ee kale ee Habar-Magaaddo ee ay wada dhasheen. Kulankan oo ay ka soo qayb-galeen 50 xubnood oo ka socday beesha Garxajis iyo 50 ka socday beesha Subeer-Awal ayaa waxa ka soo baxay natiijooyin ay ka mid ahaayeen in la sameeyo guddi-hawleedyo ka shaqeeya midnimada iyo wax-wada qabsiga siyaasadeed iyo dhaqanba ee beelaha Magaaddo. Sidoo kale waxa la go’aansaday in siyaaro Alla-bari ah lagu qabto dhulkii laga yimid ee waalidiintoodu ku aas-nayd sida qubuuraha Magaaddo, Subeer-Awal iyo Arab. Waxa kale oo la isla qaatay in kulanka danbe oo noqon doona mid ay beelaha Habar-Magaaddo u dhan yihiin lagaga dhawaaqo guddida qaban-qaabada shirwaynaha Magaaddo. Shirkan maanta oo qaybtiisa hore ka koobnayd qaddo, isbarasho iyo laab-xaadhasho, waxa marti-qaadkiisa lahaa beesha Subeer-Awal iyadoo ay kaga jawaabayeen kulan kan oo kale ah oo Ramadaantii ay beesha Garxajis marti-qaadkiisa lahayd oo ka dhacay Maansoor Hotel. Qaybtii danbe ee kulankan maanta oo ilaa afartii galabnimo socday ayaa waxa la isla naaqishay oo la isla meel-dhigay Axdi iyo Balan waxtar u yeesha diinta, dalka iyo dadka reer Somaliland oo dhanba. |
|