|
|
|
Somaliland Oo Si Weyn Looga Xusay
Ciida Soonfur Iyo
Kumanaan Dadweyne Ah Oo Ku
Tukaday Masaajiida & Garoomada Hargeysa
Hargeysa, July 28,
2014 (Haatuf) - Dadweynaha ku nool dhamaan goboladda Somaliland,
ayaa si balaadhan loogu ciidday ciidal fidriga, kuwaas oo saaka
waaberigii u dareeray goobaha loogu tallogalay in lagu oogo
salaadda ciida.
Waxa shalay aroortii wadooyinka dhex lugayanayey qaarkood
gaadiid lagu siday caruur wada faraxsan oo wajiyadoodu ka
muuqatay dareenka ciidda Islaamka, kuwaas oo xidhnaa dhar cusub,
isla markaana ku ciyaarayey qalabka caruurta ku madadaashadaan
maalmahan oo kale.
Sidoo kale, dadka waaweyn oo qudhoodu aan ka dhicin caruurta
Ciidda ayaa ku labisnaa dhar qurux badan oo ay ugu tallogaleen
in maalinta farxadda ah, kuwaas oo isku salaamayey ciid mubaarak
iyo saamaxnaa kum, iyagoo wejigoodda ka muuqdaan farxad badan,
kuwaas oo is wada gacan qaadayey.
Ciiddan oo ahayd tii soonfur, isla markaana laga soo baxay bil
cibaado, Quraan akhris iyo alla ka cabsi badan lagu jiray ayaa
loogu dabaaldegayaa sodanka cishe ee laga somaana cuntadda iyo
raashinkii la quudan jiray maalinimada si loo dareemo gaajadda
ay wehelka u yihiin boqolaal muslimiin ah oo danyar ah,isla
markaana loo badiyo wax bixinta iyo iyo sadaqadda si aakhiro wax
loogu meel dhigto.
Magaaladda Hargeysa ayaa lagu tukadday goobo faro badan iyo
fagarayaasha garoomada kubadda Cagta, kuwaas oo ay kala
qaybgaleen madaxda Qaranka oo uu hor socdo madaxweyne kuxigeenka
Somaliland ahna ku simaha madaxweynaha Cabdiraxmaan Cabdilaahi
Ismaaciil Saylici oo isagu dadweynaha reer Hargeysa kula tukaday
masjidul jaamaca magaaladda ee ku yaalla badhtamaha magaaladda
Hargeysa.
Madaxweyne ku xigeenka Somaliland C/raxmaan Cabdilaahi Ismaaciil
Saylici ayaa hambalyo u diray caalamka islaamka, isla markaana
shacabka Somaliland hambalyo ciida soonfur hawadda u marayey
inay sanadkan sanadkiisa ku gaadhaan nabadgalyo iyo caafimaad.
“Muddo 23 sanadood ah ayuu qarankani soo jiray dedaal adag ayuu
soo galay, gacmihiisana wuu isku taagay isaga oo aan wax
taageero ah ka helin caalamka, walina waxa inoo dhiman waddo
dheer oo ah himilada aynu higsanayno ee ah inaynu gaadhno qaran
madax banaan, taasina waxay ku imanaysaa dedaal dheer, wada
jirkeena, wax wada qabsigeena iyo inaga oo dhinac u wada
jeedsana,”ayuu yidhi Madaxweyne ku xigeenka oo khudbad ka
jeediyey salaaddii ciida ka bacdi.
Waxaanu intas ku daray “Waxaan leeyahay xisbiyada mucaaridka ah,
ilaahay waxa uu inoo sameeyey iimaam haddii ay wax ka qaldamaana
waxa laynoo jideeyey edaab aynu ku saxno oo subxaana laah ayaa
la yidhaahdaa, bina aadanka inta hawsha haysaa qabyo way jiri,
dhaliili way jiri, qof hawl hayana wax way ka qaldani doonaan
laakiin edaabta toosinta yaan laga tagin oo subxaana laah ha
lagu adkaado oo mucaaridnimadu yaanay inaga noqon in wixii kor
loo qaadaba la mucaarido.”
Si kastaba ha ahaatee, dadweynaha Somaliland iyo guud ahaan
caalamka Islaam ayaa maanta si wanaagsan loogu ciiday, waxaana
leeyahay sanadkan sanadkiisa ilaahay ha inagu gaadhsiiyo
caafimaad qab iyo nabadgalyo. |