|
|
|
Siilaanyo Oo Wiilka Uu Sodoga U
Yahay Iyo Wasiirka Macdanta U Wakiishay
Wada-Xaajoodka Shirkad Imaaraati
Ah Oo Lagu Wareejinayo Dekeda Berbera
Waxay Shalay Dalka Ka Dhoofeen
Wasiirkii Arimaha Dibada Oo Hotel Maansoor Shaah Ku Cabaya
Hargeysa, September 21, 2014 (Qarannews) – Wiilka uu
sodoga u yahay Madaxweyne Siilaanyo ee Baashe Cawil iyo Wasiirka
Macdanta Xuseen Cabdi Ducaale (Waji-xun) ayaa shalay dalka ka
dhoofay iyagoo ku sii jeeda magaalada Abu-Dhabi halkaas oo la
filayo inay ka sii ambaqaadaan wadahadalo ay baryahanba kula
jireen shirkadda Mubaadala ee laga leeyahay Imaaradda Abu-Dhabi,
wadahadaladaas oo ku saabsanaa sidii dekeda Berbera loogu
wareejin lahaa shirkadaasi.
Baashe Cawil ayaa ilaa sanadkii hore Abu-Dhabi ugu noqnoqonayey
si uu shirkada Mubaadala ugu qanciyo inay la gasho heshiis
maalgalin ah oo ay shirkadaasi kula wareegayso maamulka dekeda
Somaliland ugu weyn ee Berbera.
Hase yeeshee markii sanadkan gudihiisa ay wadahadaladii soo
gaadheen heer waxbadan la isku afgartay ayaa shirkada Mubaadala
waxay Baashe Cawil u sheegtay inkastoo ay ogyihiin inuu ka mid
yahay caa’ilada xukunta Somaliland, hadana ay lagama maarmaan
tahay in qaybta wadahadalada ka hadhsan uu kala soo qaybgalo
masuul rasmi ah oo ka socda dawlada Somaliland oo heer Wasiir ah
oo kalsooni buuxda ka haysta Madaxweynaha.
Hadaba Madaxweyne Siilaanyo ayaa sanadkan gudihiisa waxa uu
warqad qarsoodi ah u qoray Wasiirka Macdanta Somaliland Xuseen
Cabdi Ducaale taas oo uu u wakiishay inuu ku matalo wixii
wadahadalo ah ee dhexmaray dawlada Imaaraadka gaar ahaan
shirkada Mubaadala iyo xukuumada Somaliland.
Wasiirka Arimaha Dibada Somaliland Maxamed Biixi Yoonis oo
haba-yaraatee aan waxba lagala socodsiinin arintaasi ayaa shalay
shaah ku cabayey Maansoor Hotel markii ay Baashe iyo Xuseen
Waji-xun Madaarka ka dhoofayeen.
Shirkada Mubaadala oo Imaarada Abu-Dhabi u qaabilsan arimaha
horumarinta dhaqaalaha ayaa dalkooda gudihiisa ka sokow waxay
leedahay mashaariic ay iyadu maalgaliso oo ka socda meelo kala
gadisan oo caalamka ka mid ah.
Inkastoo Baashe Cawil uu ku guulaystay in Wasiirka Khaarajiga
Maxamed Biixi Yoonis banaanka uga saaro wadahadalada uu la waday
shirkada Mubaadala, hase yeeshee waxaan wali u suurtoobin shardi
kale oo ay ku xidhay shirkadan uu abbaanka u yahay taas oo ah
inuu Madaxweynaha Somalia Xasan Sheekh Maxamuud ka soo qaato
warqad cadaynaysa in Dawlada Federalka ee Somalia aanay waxba ka
qabin hadii uu Baashe Cawil heshiis la galo shirkado Ajnabi ah
gaar ahaan kuwa laga leeyahay Imaaraadka Carabta.
Ilaa hadda Baashe Cawil kumuu guulaysan inuu warqadaasi ka helo
Xasan Sheekh Maxamuud iyadoo uu ku hungoobay dad uu u dirtay
inay ka wasteeyaan Madaxweynaha Somalia.
Inkastoo Baashe warqad caynkaas oo kale ah uu ka haystay
madaxwaynaha Somalinad, haddana shirkaddaasi ayaa ku xidhay inuu
mid kale oo la mid ahna ka soo qaato madaxwaynaha Somalia.
Waxay ahayd 4/4/2014 markii uu wargeyska Haatuf soo qoray war
sheegayey in Baashe Cawil uu sanadkii hore ee 2013-kii
madaxwaynaha Somalia ka qaatay warqad rasmi ah oo uu Mr Xasan
Sheekh ku cadaynayo in haddii ay dawladii Somalia yihiin aanay
waxba ka qabin hadii uu Baashe Cawil heshiisyo la galo shirkado
ganacsi oo shisheeye.
Haddaba sababta uu Baashe Cawil warqadan cusub uga baahday
madaxwaynaha Somalia ayaa ilo xogogaal ah oo xoog loogu kalsoon
yahay waxay ku tilmaameen mid la xidhiidha mudada la isticmaali
karayey warqadda hore ee uu siiyey Xasan Sheekh Maxamuud oo ku
koobnayd lix bilood oo qudha, taas oo wakhtigii loo ogolaa
dhamaaday.
Sida uu Wargeyska Haatuf ku sheegay cadadkiisaasi tan iyo intii
uu madaxwayne Siilaanyo taladda dalka la wareegay, Baashe Cawil
waxa uu noqday ninka ugu awooda badan dawladda Somaliland ee
labeeya madaxwayne Siilaanyo iyo waliba inuu yahay shaqsiyada
kaliya ee labada madaxtooyo ee Somaliland iyo Somalia-ba wadda
tixgaliyaan isagoon labadda dawladood midna aan xil rasmi ah ka
haynin. |