Haatuf News

Home | Contact Us | Links |  Archives

Maxaa Dhici Kara Haddii Mar Kale Reer Hargeysa Hoggaanka Dalka Ka Fogeeyaan Gobolada Bari?

Maraykanka Oo Dejiyay tubta Qaranimada Kosovo
Maalintii doorashada Serbia caqabada ku ahayd jiritaanka,
Kosovo ayay Somaliland Booqasho ku timid Jendayi Frazer

Qaybtii 13aad ee sheekadii boqorka cajaa’ibka

Tirada qaxootiga Soomaalida oo Djibouti ku sii kordhaya

Shirkad Ka Mid Ah Shirkadaha Dhismaha Ee Hargeysa Oo Boorama Ka Wada Dhismaha Guryo Farabadan Oo An La Ogeyn Cidda Iska Leh

Fariin Hanjbaad Ah Oo Loo Diray Safaarada Finland ku leedahay
Nairobi oo lagu xidhiidhiyay iska horimaadyada Muqdisho ka dhacaya

“Waad Hilmaansantee Somaliland Cida Ku Xad Gudbaysa, Kuna Tumanaysa Sharciga Dalka U Yaal Ee Loogu Taag La’yahay Ku Dhaqma. Waa Adiga Iyo Xisbigaaga UDUB” Gudoomiyaha Gobolka Hargeysa ee Xisbiga KULMIYE

“Maayer Cabdale iyo Golaha Degaanka Berbera Halbaanu Leenahay, Unicefna Halbaanu Leenahay, Maareeyaha Wakaalada Biyahana Halbaanu Leenahay”
Xubno kamid ah Bulshada Berbera

Ma Jirto Cid Bixin Karta Biyaha Berbera Ama Ama Sheer Ka Bixin Karta Xildhibaano Ka Tirsan Golaha Degaanka

ODHAAHDA AKRISTAHA: “Ninka Xaq-Darrada U Adkaysan Waayay Ayaa Mujaahid Tababaran Aan U Arkaa, laakiin Wasiirku…”

UDUB caalamka ma dhego la'aan bay ugu warntaa War jiraaba cakaaru imin

Wasiirka maaliyadda oo shalay wasiiro iyo dadweyne kale ku soo dhaweeyeen madaarka

Hargeysa, February 7, 2008 (Haatuf) - Wasiirka Maaliyada Somaliland, Xuseen Cali Ducaale [Cawil], ayaa shalay ku soo laabtay dalka ka dib markii uu in ka badan bil iyo badh ku maqnaa dalka Kenya, isla markaana intii uu halkaasi joogay habeen ay koox budhcad ahi dhaawacyo ugu geysatay magaalada Nairobi ee xarunta dalka Kenya.

Wasiirku markii dhaawacyadaasi loo geystay ka dib waxa uu galay cusbitaal, waxaanu ku jiray cusbitaalkaasi intii ka horeysay laba todobaad horteed markii uu yimid xarunta dalka Itoobiya ee Addis Ababa, waxaanu sida la sheegay ka mid ahaa kooxo Wasiirada xukuumadda ka tirsan oo Somaliland uga ololaynayay shirkii ururka midowga.

Wasiirka Maaliyadda waxa madaarka Hargeysa ku soo dhaweeyay, xubno Wasiiro ah, Mudanayaal ka tirsan golayaasha baarlamaanka iyo boqolaal qof oo la sheegay in loo sii diyaariyay soo dhaweynta Wasiirka, kuwaasi oo xidhnaa garamo uu sawirkiisu ku yaalo, isla markaana ay ku xardhan yihiin ereyo ah ka mid yihiin ku soo dhawoow dalka iwm.
Wasiir Cawil Markii uu soo degayba waxa qariyay, kuna soo ururay wasiiradii iyo dadweynihii soo dhaweynayay, waxaana xataa suurta gal noqon weyday inuu qadar ku nasto qolka VIP-da ee madaarka, waxaana loo soo galbiyay gurigiisa magaalada Hargeysa, halkaasi oo ay mid mid u salaamayeen dadkii soo dhaweeyay, saxaafadana ugu waramay.

Wasiirku isaga oo xaaladiisa caafimaad ka hadlaya waxa uu yidhi “Waxaan aad iyo aad ugu faraxsan nahay in aan dalkii ku soo noqday anigoo caafimaad qaba dhibaatadii igu dhacdayna Ilaahay caafimaad iga siiyay , maantana dalkaygii ku soo noqday oo aad la ii soo dhaweeyay, taasina ay ii muujisay in aan ahay nin dal leh oo dad iyo tol leh, aad iyo aad ayaan ugu mahad celinayaa saaxiibadaydii wasiirada iyo Madaxweynaha oo maalin walba ila soo hadli jiray iyo saaxiibadaydii ila soo hadli jiray ee maalin walba caafimaadkayga I waraysan jiray”.

Waxaanu wasiirku intaasi raaciyay “Boqolkiiba boqol weeye xaaladayda caafimaad nabarkii I gaadhayna waa la I tolay, meeshiina way I bogsatay”.

Hase yeeshee, Wasiirka Maaliyadda isaga oo ka hadlaya in la daba galay kooxdii budhcada ahayd ee dhaawacyada u geysatay iyo inkale waxa uu yidhi. “CID-da Kenya way daba socdeen falkaasi, waxaana maalmihii u dambeeyay ay lahaayeen raad ayaanu helay, laakiin waxaad moodaa dalkaasi iyaga laftooda ayaa buuq badan galay, laakiin waxaan filayaa in bishan badhtamaheeda inay wax uun soo saari doonaan”.

Laakiin Wasiirka Maaliyaddu isaga oo ka hadlaya sidii wax ugu dhaceen waxa uu yidhi. “Habeen ayuu ahaa xiligii dhaawacu igu dhacay, waxanay ahaayeen niman iska hubaysan oo faashash sita, nasiib wanaag markii ay sadex nabar bowdada igaga dhutfeen ayay yaaceen sagaalkoodiiba, waxa dhici lahayd haddii ay sii joogi lahaayeen nabaro ka waaweyn ayay ii geysan lahaayeen. Aad iyo aad ayaan Ilaahay ugu mahad celinayaa sida uu iiga badbaadiyay nimankaasi, maalin walba Nairobi dad baa lagu laynayaa oo duhurka cad ayaa la is laynayaa ”

 

Faallo: Maxamed Cumar

Somaliland dadkeedu waxay ku kala nool yihiin lix gobol, iyadoo caasimadana ka dhigtay magaalada Hargeysa oo ah Magaalada ugu weyn dalka.

Waa meeshii ay isku raaceen reer Soomaaliland inay ka dhigtaan magaalo madaxda laga xukumo dalka tan iyo markii ay garteen inay ka baxaan midninimadii Somalia ee xaqoodii ay ku waayeen.

Hargeysa waa meesha maanta fadhiisinka u ah dawladda Somaliland, waxaana ku nool tirada ugu badan ee dadka ku dhaqan tirada ugu badan dadweynaha dalka, marka la barbar dhigo magaalooyinka kale ee dalka, isla markaana waxa ka soo baxa ama la geeyo dhaqaalaha ugu weyn ee soo gala Somaliland.

Hargeysa dhinaca kale waxay tahay meesha laga hago siyaasadda dalka Somaliland, isla markaana ah magaalada ay joogaan ciidamada dawladda u adeega ee faraha iyo noocyada badan leh,Ciidamadaa soo waagii hore ee Somaliland la dhisayey ka koobnaa ciidan beeleedyo la qarameeyey, balse maanta iska dhiga ciidammo dawladeed oo shicibkii ay ka soo dhex baxeen uga hiiliya xukuumadda, qaarkoodna loo adeegsado dulmiga iyo caddalad darada xukuumadda laga sheeganayo inay difaacaan.

Somaliland intii aanay la soo noqon madax bannaanideeda waxa la odhan jiray gobolada woqooyi, taasoo calaamad u ahayd in woqooyigu leeyahay laba gobol oo kala Bariga iyo galbeedka.

Xukuumaddii ugu horreysay ee Somaliland yeelatay 1991kii ,ayaa waxa ahayd xukuumaddii lagu sharfay halgankii SNM la gashay taliskii Afweyne, kana xoreeyey reer woqooyigii xukunkaa miltariga ahaa. Shirkii ugu horreeyey ee Burco, lagagana dhawaaqay goon isu taaga Somaliland ,ayaa dhinaca kale reer Burco ama gobolada Bari u ahaa magac weyn oo u soo hoyday markii Marxuum C/raxmaan Amed Cali loo magacaabay madaxweynihii u horreeyey ee Somaliland yeelato.

Nasiib darro wax yar kad dib markii uu marxuum c/raxmaan Tuur xukunkii dalka qabtay, waxa markiiba la kawsaday dagaallo beeleed, kuwa siyaasadeed , iyo kuwa kale oo noocyo kala duwan lahaa ,isla markaana sababay inay xukuumaddaasi ka dhammaan weydo isbaarooyin , dayday, iyo falal kale oo ciidamdii Dawladdu lahayd, oo ka koobnaa xoogaggii SNM, madaxweynaha u fasixi waayaan inuu shaqadiisa qabsado oo wakhtigiii labada sannadood ahaa kaga dhammaado xafiis la'aan, nidaam la'aan, iyo xasilooni darro ilaa laga gaadhay shirkii Boorama ee 1993kii.

Shiweynahabeelaha Somaliland ku yeesheen Boorama, oo ay ka soo wada qayb galeen madax dhaqameedyada iyo siyaasiyiin dalka ayaa lagu dhisay dawlad kale oo uu madaxweyne ka ahaa marxuum Maxamed Ibraahim Cigaal.

Cid kasta oo goob joog ka ahayd shirweynahaasi waxay ogeyd sidii foosha xumayd ee xilka madaxweynenimada looga qaaday Marxuum C/raxmaan Tuur, rag magac ku lahaa gobolkan Awdalna ugu hiiliyeen marxuum Cigaal.

Marxuum C/raxmaan tuur oo aan markii xilka laga qaaday wax yar kad dib aan waraystay, ayaan ku qanacsanayn sidii xilka looga qaaday, iyadoo isla maalintaasina an waraysi kale ka qaaday musharraxii madaxweyaha Somaliland ee isla shirkaasi oo ahaa Cumar Carte qaalib, balse Cumar Carte wuu diiday inuu ka jawaabo dareenkiisii maalintaasi.

Tan iyo wakhtigaa hoggaanka dalku wuxu gacanta ugu jiraa gobolada Galbeedka oo kala ah Awdal , Saaxil ,iyo Hargeysa ,ilaa imikana ma muuqato in gobolada Bari Hargeysa looga oggol yahay xukunka dalka.

Tuhunka caynkan ahi wuxuu sababay in siyaasiyiin badan oo ka soo jeeda gobolada Bari ay u galaan xukuumadda Somalia ee degi weyday, maamulkii Somaliland-na si fiican uga dhaqan geli waayo goboladaasi oo xitaa laga isticmaalo lacagta Somalia ,maanta arrimahaasi Somaliland geliyeen dagaal aan la ogeyn si uu ku dhammaan doono oo la doonayo in Laascaaanood lagaga fara maroojiyo Somalia.

Haddaba markaad eegto siyaasadda Somaliland ee maanta ,waxa haya madaxweyne ka soo jeeda gobolka Awdal ,iyadoo ay sax ahayd in reer Awdal la tuso inaan qolo ama qabiil keli ahi Somaaliland madaxweyne u ahaan Karin.

Waxa doorashooyinkii 2003-dii dalka ka dhacay la tuhunsan yahay inuu ku guuleystay musharraxa xisbiga mucaaradka ah ee Kulmiye Axmed Siilaanyo ,balse dareenkii reer Awdal oo reer Somaliland tix-geliyeen ayaa lagu keenay Rayaale ka dib markii siyaasiyiin reer Hargeysa ah, culimo, salaadiin ,iyo waxgarad kaleba lagu khasbay ama lagu qanciyey inay kursiga iskaga hadhaan.

Haddaba maanta oo reer Somaliland arkeen xukunka madaxweyne Rayaale ,iyo rajada lagaga baxsan karo waxyaalaha laga sheeganayo maamulka dalka ee haatan ayaa waxa dalka ka jira mucaarad xoog badan oo ay hoggaamiyaan siyaasiyiin ka soo jeedda Gobolada Bari, kuwaas oo maanta la ogyahay waxa ka haysta xukuumadda Hargeysa fadhida. Qaarkood xabsiga Madheera ayaa lagu tuuray siddii hoggaamiyayaasha Qaran, ku kalena durba waxa haysta qalalaase iyo cadaadis lagu kala daadinayo taageerayaashiisa iyo siyaasiyiintiisaba, waxana inta badana eedda iska leh siyaasiyiin ka soo jeedda deegaanka Hargeysa, kuwaas oo la tuhunsanyahay inuu ka socon la’yahay shirweyne xisbigaasi yeelan lahaa.

Waxa kale oo la ogyahay sida ragii ka qayb galay SNM ee u hiilin lahaa xisbigaasi mucaaradka ahi ay isaga mucaarad ugu yihiin, iyadoo arrimahan ay ka muuqato sida ay reer Hargeysa mar kale u doonayaan inay mucaaradka uga horjoogsadaan hoggaanka amaba guusha doorashooyinka soo socda.

Si kastaba ha ahaatee ,waxay dad badani isweydiin karaan maxaa iman kara haddii mar kale guusha mucaaradka xoog lagaga qaato?

jawaabaha su'aashaasi iyo kuwa la mid ahiba waa kuwa dalkan u soo jiidi kara kala qaybsanaan , iyo arrimo kale oo daciifin kara ictiraafka dimqraadiyadda aynu sheegeynno, qarannimada,iyo amniga ,arrimahaas oo gobolada Bariga mar kale ku sii riixi kara Somalia, Somaliland-na ku soo qaban kari weydo nabad iyo dagaal midkoodna.

Washington DC, February 7, 2008 (Haatuf) – Dawladda Maraykanka ayaa markii ugu horeysay si rasmi ah u qeexday inay ogolaatay qaranimada iyo madax banaanida dalka Kosovo oo ah, taasi oo ah dalkii ugu dambeeyay ee qaarada Yurub ay dawladda Maraykanku aqoonsato madax banaanidiisa.

Sidaana waxa lagu sheegay warsaxaafadeed ka soo baxay xalay Wasaaradda Arrimaha Debada Maraykanka oo ay soo saartay ka dib markii ay dawladaha Yurub shaaca ka qaadeen inay ciidamo u diri doonaan Kosovo, si ay uga nabad geliyaan weeraro kaga yimaada dawladda xoogga weyn ee Serbia ee haysta taageerada Ruushka.

Talaabadani waxay ka dambaysay ka dib markii uu musharixii mucaaradka mayal adagi ku guulaystay doorashadii todobaadkan gudihiisa ka dhacday dalka Serbia, kaasi oo sheegay in aanu marnaba aqbali karin madax banaanida Kosovo ee ay wadamada reer galbeedku dabada ka riixayaan.

Kosovo waxay noqon doontaa wadankii ugu dambeeyay ee qaaradda Yurub madax banaani buuxda la siiyo, waxaana haatan ciidamo ka ilaaliya weeraro kaga yimaada Serbia u diraya dalalka waaweyn ee xubnaha Midawga Yurub.
Sidoo kale, dawladda Maraykanka ayaa iyadu xalay soo saartay qorshaha lagu dhaqi doono dalka cusub Kosovo, waxaanay soo saartay waxay ugu yeedhay jidka qaranimada Kosovo oo ka kooban 12 qodob, kuwaasi oo ay ka mid yihiin wada noolaanshaha dadka kala isirka ee reer Kosovo, kuwaasi oo isku maamuli doona hab dimuqraadi ah ku dhaqanka Sharciga, ilaalinta xuquuqda aadamaha iyo xoriyaadka aas-aasiga iyo nabad iyo barwaaqo ku wada noolaanshaha mandaqadooda.

Waxa kale oo lagu sheegay qorshahan loo bixiyay jidka qaranimada Kosovo, in dalalka Midawga Yurub ay u diri doonaan ciidamo ilaaliya, isla markaana ay qaramada Midoobay iyo maamulka haatan ee Kosovo dalkaasi ka dhaqan doonaan qorshaha jidka qaranimada ee 12 qodob ka kooban, waxaana qodobadaasi lagu dhaqan gelin doonaa muddo 120 gudahood ah.

Muddada gudaheeda maamulka Qaramada Midoobay ee Kosovo isbedeli maayo, beesha caalamkuna dusha ayay kala socon doontaa.
Baarlamaanka shacabka ee Kosovo ayaa muddadaa gudaheeda diyaarin doona dastuurka ay yeelanayso Kosovo, isaga oo la tashanaya beesha caalamka iyo dhaqan gelinta tubta qaranimada Kosovo.

Marka laga gudbo muddada ku kala guurka ee 120 maalmood ah, waxa ku eg waqtiga maamulka Qaramada Midoobay ee Kosovo, waxaana kala wareegi doona maamulka Kosovo ee baarlamaanka iyo Xukuumadda ah.

Muddo sagaal bilood gudahood ahna waxa laga diyaarin doonaa doorashooyinka dawladaha hoose iyo guud ee baarlamaanka iyo Ra’iisal wasaaraha.

Qaranimada Kosovo waxay jidka u xaadhay Somaliland, iyada oo maalintii doorashada Serbia oo caqabad ku ahayd Madax banaanida Kosovo ay Somaliland booqasho ku timid kaaliyaha Xoghayaha Arrimaha Debada ee Maraykanka u qaabilsan Afrika.

Boqorka waxa kale oo aad looga hadal hayaa jasiirada oo dhan wixii dad iyo jin deganaaba waxay noqdeen kuwo aad u xaq dhawra, oo waxay si weyn uga heleen ninkan daacadnimadiisa iyo sharafta u leeyahay, oo wuxuu aad u soo jiitay maskaxdooda, marka u la hadlayana waa nin hadalkiisa ay fahmi karayaan oo ka dhaadhicin kara ujeedooyinka u leeyahay, waxa kale oo ay ka arkeen inuu yahay runta aan ka gaban oo sheega ka dibna waxay u aqoonadeen nin qiimo weyn agtooda ku leh inui yahay.

Dadka jasiirada degan waxa ay boqorka u doorteen inuu ka mid noqdo golaha hogaaminta oo ka qayb galo oo weliba madaxa golaha maamulka noqdo, waxa kale oo u boqorku hayaa maamulkii beeraha iyo xoolaha nool ee odayga inanta uu ka qabaa leeyahay, labada hawloodba waxa uu ku noqday nin si fiican u maamula.
Dadka jasiirada degani waxay sidaa u yeeleen ka dib markay ogaadeen iyaga oo tixraacaya taariikh nololeedkiisii hore ee boqornimo, haatanse aanu joogin dhulkii u ka tali jiray ayay la noqotay in ay ninkan ku sharfaan inuu ka mid noqdo xubnaha ugu sareeya jasiirada.

Boqorka isla markiiba waxa u ka helay jasiirada soo dhoweyn fiican ka dib markii ay si aad ah isku barteen bulshadii halkaas ku dhaqnayd una dhiibteen inuu hogaaminta –sare ka qayb qaato.

Maalin maalmaha ka mid ah oo dadka meesha degani ay xusayeen mid ka mid ah caadooyinka ay dhaqan ahaan u leeyihiin waxay ku marti qaadeen boqorka cajaa’ibka ah inuu kala soo qayb galo ka bacdina halkaas waxay ku siiyeen bilad sharaf.

Boqorka waxa kale oo aad u jeclaaday dhammaan shaqaalaha ka shaqeeya beeraha iyo xoolaha odayga u inanta ka qabaa leeyahay ee u isagu {boqorku} madaxda u yahay, oo dadka iyo jinkuba noqdeen kuwo ka dambeeya oo ixtiraam u muujiya, balse boqorku ilaa xad marka u la hadlayo qoomka jinka ah ee meesha {jasiirada} degan waxa u isticmaalaa isaga oo aad iskaga ilaalinaya inuu erayo ay iskaga hor yimaadaan ku yidhaahdo hadal badana lama galo, waxana u sidaa u yeelay oo ogyahay in jinka kiisa aan muslinka ahayni dhibaato badan yahay, hadduu isku furfurana kolay shaki jirayo laakiin waxa ay is barteen dhawr nin oo jinka ka mid ah kuwooda hogaamiya oo weliba mid ka mid ahi yahay chief Caaqil kuwa kalena yihiin cuqaal.

Boqorku wax u sidaa u shaqeeyaba wakhtina waxa u ka qayb galaa shirarka xubnaha hogaaminta deegaanka Jasiirada, wakhtiyana shaqadiisa maamul ee beeraha iyo xoolaha nool ee odayga sodoga u ahi leeyahay.

Muddo sanad iyo dheeraad laga joogo ka dib waxa boqorka iyo gabadhiisa u dhashay wiil kaas oo loo sameeyay damaashaad iyo duco, baahi weyn oo boqorka laftiisu u qabay inuu Illaahay caruur siiyo, isaga oo aanay gabadhiisii hore u dhalin wax ubad ah, waxaanay noqdeen kuwo aad ugu farxay wiilka u dhashay boqorka iyo gabadhiisu.
Waxa dhacday in maalin isaga oo boqorku jooga beer ka mid ah beeraha u maamulkooda hayo ayaa waxa u yimi nin ka mid qoomka jinka ah ee jasiirada degan isla markaana ahaa kuwa boqorka ay is barteen ee ugu mudan jinka waxana u la socodsiiyey boqorka in maalinta 1aad ee todobadka soo socda leeyihiin oo u dabaal dagayaan ciidd ka mid ah ciidaha ay sida weyn u soo dhoweeyaan.

Markii u boqorku weydiiyey ciidaasi waxa ay tahay waxa u ugu sheegay inay tahay mid si weyn ay u xusaan oo rag iyo dumariyo caruurba ay ka wada qayb qaataan isla markaana loo baahan yahay buu yidhi inaad nagala soo qayb gasho boqorow.
Boqorku isaga oo yaaban ayuu ninkii u celiyey hala gaadho maalintaas iyo waayahay ayay ku kala tageen.

Markii ninkii fariinta u keenay ka tagey ayaa boqorku weydiiyey nin ka mid ah dadka jasiirada degan waxa ay qabtaan ama sameeyaan jinku maalintaas u sheegayay ninku
Intaa ka bacdina waxa loo sheegay boqorka inay tahay maalintan ay sheegayaan ciid ay leeyihiin oo jinku sameeyo dabaal-deg ay ku lifaaqan tahay dhoola-tus ay dadka u faanayan oo tusayaan quwadaha iyo farsamooyinka ay dadka dheer yihiin ee kaga horeeyaan.

Boqorkii wax ku ka yaababa waxa u yidhi “la arki doonaa waxa maalintaas ay sameeyaan” ka dib ayuu nin shaqaalihiisa ahi ku yidhi “boqor maalintaa waxa ka mid ah oo ay sameeyaan, dadka ay casuumaan waxay u xidhaan kabo birra”, markuu hadalkaa ku yidhi ayuu boqorkuna yidhi isaga oo dhoola-cadaynaya oo la kaftamaya “ waar iyaga iska daayoo aniga ayaa kabaha birta ah gashanaya.

Djibouti, February 6, 2008 (Haatuf) – Dadka qaxootiga Soomaalida ah ee ka soo barakacay Koonfurta iyo Badhtamaha Somalia ayaa ku sii kordhaya dalka Djibouti.
Sida ay sheegtay hay’adda Qaramada Midoobay u qaabilsan Qaxootiga ee UNHCR tirada dadka qaxootiga Soomaalida ah ayaa sii kordhaysa, iyaga u haajiraya dalka Djibouti iyo wadamada Carabta.

Hay’addu waxa ay sheegtay in dalka Djibouti ay yimaadeen in ka badan 700 oo qof oo qaxooti Soomaali ahi sannadkii 2007, kuwaasi oo Djibouti ka soo galay xadka Lawyacado ee ay Djibouti la wadaagto Somaliland.

Hase yeeshee waxa ay hay’adu intaasi ku dartay in 400 oo ka mid ahi ay bishii January yimaadeen. Sidoo kale dad badan oo qaxooti ah ayaa doonyo ku yimid magaalada Obock ee waqooyiga Djibouti ku taala sida laga soo xigtay masuuliyiinta dekedaha Djibouti.
Booqasho ay ku tageen magaalada Lawyacado ee xadka u dhaxeeya Somaliland iyo Djibouti masuuliyiin ka kala socota hay’adda UNHCR iyo dawladda (Djibouti) waxa ay saraakiisha xuduuduhu u sheegeen inay jiraan qaxooti joogto ah oo aan garanayn dal meel ay ku socdaan ay yimaadaan xadka iyaga oo magangelyo doon ah.

Qaar ka mid ah qaxootigan ayaa qarda jeexa taagaga xadka si ay uga baydhaan in saraakiisha xuduuduhu joogaan, hase yeeshee hay’adda UNHCR iyo masuuliyiinta dawladda Djibouti ayaa arrinta soo fara geliyay, isla markaana Djibouti ku qanciyay inay ogolaato inay dadkani si sharci ah ugu soo gudbaan Djibouti hab qaxootinimo ah.

Hay’adda UNHCR iyo masuuliyiinta Djibouti ayaa isla gartay in dadkan inta hore lagu hayo meesha la yidhaahdo Cali Cadeh oo marka hore hoy u ah in ka badan 7,000 kun oo qof oo 3,500 oo qof ka mid ahi ay ka mid yimaadeen Koonfurta iyo badhtamaha Somalia halka ay 2,800 oo qof oo ka mid ahna ay UNHCR sheegtay inay ka yimaadeen Somaliland.

 

Boorama, February 7, 2008 (Haatuf) – Mid ka mid ah shirkadaha dhismaha qaabilsan ee laga leeyahay degaanka Hargeysa oo aan magaceeda la sheegin ayaa tan iyo bishii hore Boorama ka wadda dhismayaal guryo cusub, qaarna dhammaystirtayb.

Guryahan haatan dhismahoodu socdo oo tiradoodu gaadhayso ilaa shan guri oo waaweyn, qaarna loo diyaariyey in laga dhigo dabaqy, ayaan ilaa imika magaca shirkadda dhismahan qandaraaska lagu siiyey calaamaddeeda lagu arag goobaha dhismayaashaasi, iyadoo dhinaca kalena masuuliyiinta hawsha dhismaha wadda la ogyahay uun inay yihiin shirkadaha dhismaha ee degaanka Hargeysa, shaqaalaha reer Boorama ee ka hawlgala dhismayaashaasiina aanay haba yaraatee ka hadal cidda iska leh iyagoo hadalka kuugu soo gaabinaya garan maayo ee ma shaqaysanaysaa ayuun baa la igu yidhi.

Dhismayaashan oo inta badan isu wada eg xagga dhismaha iyo naqshadda guud, ayaa waxay ku kala baahsanyihiin istaanka looga baxo Hargeysa ee Boorama ku yaalla ilaa agagagaarka sariibadda hilibka iyo qudaarta ee Boorama, iyadoo muddada dhismayaashaasi qaarkood lagu dhammaystiray uu ahaa wakhti kooban maadaama si hagar la'aan ah qalabka dhismaha loogu dhammaystiray.

Ilaa imika lama oga cidda shakhsi ahaan iska leh dhismayaashaasi, iyadoo dhinaca kalena aanan wax xog ah laga haynin in mulkiilayaasha guryahaasi yihiin qaar ka mid ah masuuliyiinta dawladda Somaliland iyo imay yihiin shakhsiyaad qurbajoog ah ama inay yihiin ganaacsato u dhalatay degaanka Boorama ama gobolkaba.
Sidoo kale waxay guryahani ka simanyihiin isu ekaanshaha qalabka dhismaha loo adeegsasday, sida albaabada oo wada biro ah, daaqadaha iyo xaddiga dhulka ay ku fadhiyaan oo isu wada qiyaas ah, waxayna dhismayaashani buuxiyeen dhul ama jagooyin bannannaa muddo dheer oo malaha dadkii lahaa ay u waayeen itaal iyo dhaqaale ay ku dhistaan.

Si kastaba ha ahaatee qaar badan oo ka mid ah dadweynaha Boorama ayaa isha ku haya cidda yeelan doonta guryahaasi marka ay dhammaadaan, kuwaas oo wakhtigan xaadirka ah qaarkood la yaabbanyihiin kharashka ay tuhunsanyihiin inuu gaadhayo boqollaalka kun ee Doolar ee guryahan lagu bixinayo haddii uu leeyahay shakhsi keliya iyo haddii ay dad kala duwani leeyihiinba.

Top

Nairobi, February 7, 2008 (Haatuf) Safaaradda Dalka Finland ku leeyahay magaalada Nairobi ee xarunta dalka Kenya ayaa sheegtay inay heshay fariin loo soo mariyay aaladda Internet-ka oo looga digay inay la kulmi doonto weeraro argagixiso, iyada oo lagu xidhiidhinayo arrimaha dalka Somalia.

“Waxa aanu helnay fariin digniin ah oo la noo soo mariyay boosta internet-ka (Email), fariintaasi oo xambaarsan hanjabaad ah ay nagu xidhiidhinayaan inaanu Itoobiya u janjeedhno marka ay timaado arrimaha Somalia ka taagan waqtigan xaadirka ah” Sidaa waxa tidhi, Heli Sirve oo u fariinta hanjabaada ah ee loo soo diray uga waramaysay wakaalada wararka ee Reuters.

waxaanay Haweenayda safiirada uga ah dalka Finland magaalada Nairobi intaasi raacisay in hanjabaadan ay ku wargeliyeen bileyska Kenya ee la dagaalanka argagixisada, isla markaana ay ka dalbeed in la baadho fariintan oo ay heleen dabayaaqadii todobaadkii tegay.

Safiiradu waxa kale oo ay sheegtay in aanay cadayn cida soo dirtay fariintan hanjabaada ah, isla markaana aanay garananyn sabab safaaradoodu loogu hanjabo in la soo weerarayo.
ilaa hadda ma jirto cid sheegatay inay ka dambaysay fariintaasi iyo meesha looga soo diray toona.

Safaaradda Finland ee magaalada Nairobi ayay arrintani ku abuurtay walaac sida la sheegay ay ka qabaan in la soo weeraro.

Sannadkii 1998-kii ayay ahayd markii safaaradii Maraykanku ku lahaa dalka Kenya la qarxiyay, isla markaana ay ku dhinteen dad tiradoodu ka badan laba boqol oo qof.
Dawladda Maraykanka ayaa waqtigaasi ku eedaysay kooxo asal raac muslimiin ah oo xidhiidh la leh Al-Qaacida inay ka dambeeyeen weerarada loo geystay safaaradihii Maraykanka ee Nairobi Kenya iyo Daarasalaam Tanzania.

Hanjabaada waqtigan loo diray Safaaradda Finland waxay ku soo beegantay ay xaalado colaadeed oo qabiilo is-ugaadhsanaya isku bedelay ka jiraan dalka Kenya, kuwaasi oo ka dhashay doorashooyinkii madaxtinimada dalkaasi ee 27/12/2007.
 

Hargeysa, February 7, 2008 (Haatuf) - Gudoomiyaha Gobolka Hargeysa ee Xisbiga KULMIYE Axmed Cumar C/laahi (Xamerje) ayaa jawaab kulul ka bixiyay eedaymo uu shalay xisbigooda u soo jeediyay Gudoomiyaha siyaasadda ee xisbiga talada haya ee UDUB.

Mr. Xamerje waxa uu arrintaasi kaga hadlay warsaxaafadeed uu xalay soo saaray, waxaanu ku yidhi, warsaxaafadeedkiisa “Sida aynu la wada socono waxa warbaahinta maxaliga ah ku soo baxay warsaxaafadeed uu soo saaray 05/02/08 Gudoomiyaha arrimaha siyaasadda ee xisbiga UDUB, Cumar Jaamac Faarax Warsaxaafadeedkaas oo uu ku dhaliilayo xisbiga mucaaradka ah ee KULMIYE waxa uu kaga hadlay weftigii wasiirka Afrika u qaabilsan dawladda Maraykanka Assistance secretary of State for African Affairs ee Somaliland yimid 03/02/2008, in xisbiga KULMIYE uu ku yidhi yaan la aqoonsan Somaliland.

Isagoo tusaalayaal u soo qaatay qodobo dhawra oo intuba ah dhaliilo hubaashii ceeb laga xishoodo ku noqonaya xisbiga talada haya oo aan garanayn macnaha waxa uu dhaliisha ka dhigayo inay tahay dhaliisha daaha ka saaran xsibiga UDUB.

Haddaba marka laga hadlayo qaddiyada gooni isku taaga Somaliland waa mid qof walba oo SOmalilander uu xilka saaran yahay, lamana qaadan karo xisbiga KULMIYE oo hubaashii uga lexe jeclo badan xisbiga UDUB jiritaanka qaranimada Somaliland, in xisbiga UDUB yidhaahdo KULMIYE waxa uu diidan yahay aqoonsiga Somaliland.
Tusaale ahaan.

Cumar Jaamac waxa uu soo qaatay KULMIYE weftiga ku yidhi xukuumaddu kumay dhaqmin miisaaniyadii sannadkii hore
waxa kale oo uu sheegay in xukuumadu aanay sharciga ku dhaqmin oo ay is hortaagto
In si sharci darro ah loo xidhay siyaasiyiintii ururka Qaran
Iyo in weliba in xukuumaddu suuqii ganacsiga ka dhigtay mid cid gaara ah u xidhan (monopoly).

Haddaba, markaad eegto qodobadan uu soo qaatay Gudoomiyaha arrimaha siyaasada ee xisbiga UDUB waxa uu kaga gar naqayaa waa qaladaadkii gudaheena ee maxaa kor loogu qaadayaa. Haa!

Haddaba waxaan kuu sheegayaa Xoghaye weftigani inoo yimid inaanay wax seegani jirin, hadalkayaguna waxa uu u dhigan yahay qaladaadka jira ee idiin gaarka ah hana loo qariyo ee waxba aad hilmaantay inaan u taaganahay qaloocaaga inaan toosiyo aniga oo ka dhawaaqaya inaad hagardaamaynayso geedi socodka dimuqraadiyada.

Haddaba Xoghye waxaan idin kula talinayaa in hubaashii ay weftiyo badan inoo iman doonaan
Wax wal oo aad xumaysaana in la sheego waxaan u ah xisbi Qaran
Guntii iyo gebagebadii waxaad sheegtay inaan is hortaagay aqoonsigii Somaliland, laakiin waad hilmaansantee Somaliland cida ku xad gudbaysa, kuna tumanaysa sharciga dalka u yaal ee loogu taag la’yahay ku dhaqma. Waa adiga iyo xisbigaaga UDUB

 

Anaga oo kamid ah Dadweynaha ku dhaqan magaalo xeebeedka Berbera waxaanu aad iyo aad uga xunahay Ogolaanshaha Maayer Cabdale Maxamed-Carab ugu ogolaaday Hay’ada Unicef iyo cidii kale eek u wehelisaba in Biyaha magaalada laga saaro gacantii dawlada oo laga dhigto Meherad wadaag ah, runtii waa mid aanaan ka filayn oo u qaadan waa nagu noqoqtay markaanu maqalay waxa wargeyska Haatuf bogiisa hore ku qoran “maayeka Berbera oo ogolaaday in biyaha Berbera Noqdaan Meherad lagu shuraakoobayo” taasi yaab iyo amakaag .........waxa yaabka yaabkiis iyana nagu noqotay markaanu raadinay wargeyskii ay arintani ku qorayd ee aanu akhrisanay ayaa waxa nagaga soo baxday in cida wax wadaagaysa ay kamid yihiin xubno kamid ah golaha Degaankawaa sida qoraalka ku taalay eh, waxba taas ku dheeraan mayno oo waa taariikh lama ilaan waan ah waana dhito u taal, cid akasta oo taageerta ficilkan lagu doonayo in Meherad wadaag ah laga dhigto biyaha danyarta Reer Berbera ka gaboodsadaan Jawiga Dabiiciga ah ee Xagaaga, Ilaahaybaa ugu deeqay Biyaha Dubaar waa Xikmad Illaah,.....hadaba waxaanu leenahay cida sidaas ku talisay iyo cida ku raacday midkoodna kuma wareejin karo waana lama taabtaan Deeqda UNICEFN-a waxa ka weyn Deeqda ilaaha-weyn ee Buurtaas nooga dilaaciyey Ishaa Dubaar, waxaanu Fariintayadan gunaanad uga dhigaynaa Unicef iyo hawlwadeenadeeda Hal baanu leenahay Wasaarada Macdanta iyo Biyahana Halbaanu Leenahay, Maayerka iyo xubnaha Golaha degaankana Halbaanu Leenahay, Maareeyaha wakaaladana Halbaanu Leenahay , Unicef waxaanu leenahay Lacagta ay Hayso ee ay leedahay ku aamini mayno Meel Xukuumadu gacanta ku Hayso Hadii aanay Dowladayada ku aaminayn hayska haysato, Wasaarada M. iyo biyahana waxaanu leenahay Macal Asaf waanu ka xunahay iyadoo laydin ceebaynayo oo la leeyahay waxba laguma aamini karo in aad sacabka u tuntaan Cidii siaas idin lahayd (UNICEF), Meeyarka iyo Golaha degaankana waxaanu leemnahay Ma waxaanu Idin moodaynay mise waxaad noqoteen mise waxaan loo noon doonin, waxaanu idin moodaynay markaad na doortay lahaydeen kuwii wax noo qaban lahaa waxaadse noqoteen kuwa laga inaabsaday waxaanaanse u noqon doonin in aanu dib idiin doorano, Maareeyaha wakaalada waxaanu leenahay Hadaanad sidii Duur ama Maxamuud-biyoole yeeli karayn wakaalada biyaha Berbera way isbixinaysaaye aad yar oo dhalatay xilka dhulka iska dhig waa waxaan dhici kreyn in shirkad ganacsato ah oo sheer wadaag ahi meharad ka dhigtaan adna aad maareeye ka ahaataaye
Maacyayada xubnaha

1- Cali Xaashi Maxamed
2- Maxamed Cilmi Axmed
3- Maxamed Axmed Cige
4- Ibraahin Cali Xasan
5- Hugur Aadan Madar
6- Axmed Maxamed Aadan (qamash)
7- Shiine Maxamed Xuseen
8- Aamina Maxamed
9- Canac Cusmaan
10- Sh. Axmed Faarax Cabdi
11- Maxamed C/laahi Muuse (Indho)
12- Aadan Muxumed Xasan (Akal)
13- Faarx Saleebaan
14- C/rashiid C/raxmaan cali
15- Cabdi Faarx Ducaale
 

Berbera, February 6, 2008 (Haatuf) Xildhibaanada Jaamac Guuleed iyo Cawil Cali Sugule oo ka tirsan golaha degaanka ayaa sheegay in aan nidaamka biyaha magaalada Berbera waxba laga bedeli karin, isla markaana aanay ka dhigi karin wadaag maamulka iyo dadweynaha toona aanay wareejin karin, iyada oo ay biyuhu ka mid yihiin adeegyada looga fadhiyo maamulka dawliga ah ee degmooyinka.

Xildhibaadani waxa kaloo ay si kulul u naqdiyeen Hay’ada Unicef iyo wasaarada macdanta iyo biyaha, kuwaas oo ay ku eedeeyeen inay muddo dheer geed dheer iyo ku gaabanba u fuushay sidii ay gacanta xukuumada uga hor-saari lahaayeen biyaha magaalada Berbera.

Waxaanay xildhibaanadan uga digeen hay’ada Unicef in aanay deeqda ay adduunka kaga soo qaaday biyaha Berbera aanay noqonin kuwa abuura dhibaato iyo xasilooni daro ka dhex dhacda maamulka iyo dadweynaha magaalada Berbera. Waxaanay ugu baaqeen haddii ay jirto hanti ay unicef u hayso Biyaha Berbera in aanay shuruud kaga dhigin nidamka wadaaga ah ee waa inay gelisaa Biyaha wixii ay deeq bixiyayaasha kaga soo qaadatay.

Xildhibaanada oo habeenkii xalay khadka telephone-ka kula soo xidhiidhay Haatuf waxa kale oo ay sheegeen in aanay Biyuhu noqon karin meherad macaash laga doono oo ay maal-gashadaan dad faa’iido doon ahi, isla markaana ay cid kasta oo biyaha Berbera ugu deeqaysa hanti hay’ad iyo ganacsataba ay soo dhoweynayaan.

Xildhibaanadani waxay sidoo kale, maareeyaha wakaalada Biyaha u soo jeediyeen inuu ka waantoobo hadal haynta barnaamijka biyaha uu goor walba la soo taagan yahay isma bixinayaan, maadaama aanu marnaba wax xisaabaad ah soo hordhigin golaha degaanka ee ay hoos yimaadaan biyuhu sida uu qabo xeer 23 ismaamulka goleyaasha degaanka ay biyuhu soo gaadhaan Berbera oo sanadka intiisa badan ah meel kulul, isla markaana looga baahan yahay biyo badan oo biyaha 50% ay ku yimaadaan kala sareynta dabiiciga ah ee dhulka (gravitation) ayaa waxay u sahlaan dadka reer Berbera inay biyaha ku helaan qiimo jaban oo aad uga hooseeya biyaha shidaalka lagu soo saaro.

Xaq-darrada 8 sannadood oo aan u shaqaynayay hay’adda Halo Trust xaqood ayuu gaalkii la toogtay xaq darro igaga haystaa, xukuumaddana waan u dacwooday mana hayo.
Sida halkan ku cad, waxaan ka mid ahaa shaqaalaha Halo Trust ee miinada ee Hargeysa ka hawlgala muddo 8 sannadood ah 20/10/1999 ilaa 25/08/2007 ka dib gaalkii dhawaan la toogtay ayaa si xaq darro ah iiga joojiyay shaqadii, xaqaygiina ku haysta ilaa imika xaqdaro. Waxaan u dacwooday sida sharciga ah wasaaradda ku shaqada oo ah Wasaarada Caafimaadka iyo SHaqada, markay baadheen iyagoo hay’adda SMAC la kaashaday waxay u qoreen gaalka warqad ay xaqayga 8 sannadood ah ee uu sharci uu iigu diidaa jirin I siiyo, Agaasimaha guud ee shaqada iyo shaqaalaha iyo SMAC wuu iska soo diiday, Wasiirka Caafimaadka iyo SHaqada ay qudhoodu ay sidii oo kale ayuu waraaq amar ah ugu qoray, dhegahay ka furaysteen, Wasiirka Caafimaadka iyo Shaqadau waraaq qoraala ayuu u gudbiyay madaxweyne ku xigeenka oo uu kaga hadlay inuu iga siiyo xaqaa, isaga oo ilaalinaya gacanta ku haya muddada aan dacwoonayay odhan 6 bilod waa halkii aan ku joojin lahaa dacwadayada, wax kasta aan yeelo’e, haddaanu iiga qaadin xaqaygaa.

Waxa kaloo qof kasta garan karaa qof shaqaale 8 sannadood ahaa inuu yahay qof shaqadiisa ka adag, balse waxaanu ka adkay aanu intaas oo sanno joogeen, sidaa darteed waxaan ka soo shaqeeyay anigoo madax hay’adda ka ahaa dhammaan gobolada JSL iyo degmooyinkeeda oo dhan, wuxuu kaloo qofka shaqaalahayaga ahi xaq u leeyahay sida heshiisku dhigayo 2 dignoonood oo ta hore 6 bilood shaqanayso, ta kalena 1 bil.
30 nin oo gaalkaa la toogtay xaq darro ku wada eryay ha iga horeeyo ama ha iga dambeeyee may helin, waxaanu nagu yidhi, raggiinan meesha waa ku raagteen iyo sidiinaan idiin necebahay, waana ta toogashada keentay.

Waxa kalo oo la iis heegay inuu ninkaa toogtay ku jiray bisha dambe ayaa shaqadan kugu dambaysa, isaga oo aan danbi gelin, waxaanu ahaa (Supervisor) maamule khabiir ku ah, waxaanu ragayagaa ku bedelay, haween miinaystayaal ah uu ku sheegay oo direys iyo kabo qudha siiyay, raggana hawdka u raaca oo ay horaantoodii miino ku qaraxday.
Waxaan xukuumadda u sheegayaa sida qoraalka Wasiirka caafimaadka ku cad inuu ninkaa gaalka ahi uu xaalad abuur yahay, anagana xuquuqdayada uu duudsiyay, masuul waxaa ka ah xukuumadda JSL.

Waraysiga uu Wasiirka Arrimaha Guduhu siiyay BBC-da ee uu ku amaanayo ninka bileyska ah ee toogtay mujaahid Cabdi Madoobe ee uu yidhi waa bileys tababaran, waxaan leeyahay tababar daayo maaha nin shaqadiisa garanaya, waayo wuu ogaa in maalinta toogashadu timid maalintii ka horeysay cadho ay ku kala tageen gaalka iyo ninka shaqaalaha ahi, subixii markuu isagoo hubaysan dhaafayay muxuu u baadhi waayay haddii shaqadiisa garanayay.

Ma markuu is-dhiibay ee hubkii rag kale ka qaadeen, isna gacanta lagu dhigay ayuu toogtay ninka xaq-darrada u adkaysan waayay ayaa Mujaahid tababaran aan u arkaa.
Aadan Cali Cali
 

Waxa nasiib daro ah in maanta, udub ay cid kale wax saarto. waxaan akhriyay war bixin ay udub ku dhaleecaynayso xisbiga
kulmiye. oo ay leedahay jendy ayuu naga dacweeyay.

waynu wada ogsoonahy in m/weyne riyale markastuu, baxo uu dadka ku yidhaahdo waxaan iib gaynayay, qadiyadeena "wax
walba way naga, aqbaleen. wanuna is fahmnay" iyo hadalo la mid ah oo aan afka baarkiisa dhaafsiisanayn. somalidu waxay
ku maahmaahdaa."Qofkii soo joogso laga kariwaayo soo jifsaa laga helaa" Udub dadka runta u sheegaa laga kari wayay
maanta se waxaynu helnay dadkii ay beenta inoogasheegi jireen oo inoo sheegay waxay u sheegeen.

Riyale hadii uu ictiraaf radin u baxay muxu ula kulmiwayay shacbkiisii isku xilqaamay so dhawayntiisa ee uu uga door biday
qoob ka ciyaarka?

sidaynu wada ogsoonahy M/weyne waxa lagu yaqaanaa markuu danqaran,hadaf,IWM hiigasanaayo inaanu koox wax ku
doonan, ee uu qaran ahaaan wax kudono calamkuna wuxu tix gelinayaa anay ahayn koox,xisbi ay tahay qaran
manta M/Riyale ma kaxaystaa cid aan ahayn wasiiradiisa?
Jawaabtu waxay thay m/wenuhu riyale wuxu a xaystaa xisbigiisa iyo wasiiradiisa isagoo iyaga laftooda sii kalagura una kala
horaysiiya. ninba ninku umada, horumarinta dalka, hiiigsida himilooyinka , aqoon helista ka naceb yahy
Taaana waxa ku cadaynaya hadii ay kalaaragti duwanan la hayeen way is khilaafi lahyeen
welina socdaaladii uu madaxweynuhu ku baxay intii u xukunka hayay wax natiijo ahoo aan dhafsisnayn "WAANU IS
AFGARANAY " . Lagama hayo
waxa lagu yaqaanaa umad,qaran,dal waa inay yeelato hadaf midaysan oo ay ku hiigsanayaaso waxay rabto
Waxaynu wada ogsoonahay dalkan (somaliland) inuu yahay dal yar markaloo eego Q/africa hadana uu yahy dalka ugu
xasiloonida, deganaanshaha iyo nabada badan.
Taana waxa sababay "ALLE KA SOKOW" Halgankii dheeraa ee ay umadani soo gashay, ee ay horkacayeen. Mujahidiintii SNM
oo aynu maanta aragno halka tariikhdoodii marayso
SNM waxay ahayd dad kadagalamaya samata-bixinta, badbaaadinta , iyo mustaqbalka, dadkooda & dalkooda. Wyanu wada
ogsoonahaay wixi dadkan iyo dalkan ba lagula kacay oo ahaa mdi loogu talogalay inlagu tirtiro dadka ku dhaqnaa gobollada
somaliland .
SNM na may ahayn wax cirka ka soo dhacaay ee waxay ahyd dadkii damiirka, dhiiga iyo dad nimada la haa ee ka danqaday
waxa lagu hayo dadkooda ee sida adhiga kawaanka loogu sameeyay,
weli calamka kamay dhicin meel lga sameeyo kawaan bini aadmka lagu qalo oo aan somaliland ahyn, sanadahii 1985 ilaa
1989 gobolada somaliland waxay noqdeen suuqa lagu gowraco dadka dadkaasina may ahyn qar meelkale laga keenay ee
waxay ahaayeen dadkii udhashay/kasoo jeeday G.somaliland,
waxaana mudan in laqoro tariikhdooda loona dhiso taalo ay jiilka danbe ku xasuustaan wayo qaran waxa lagu yahay waa
inaaad taqaana mesha dalkaagu ka yimi iyo taariikhdiisa oo aaad dakaka dhaadhicin kartaa waxad tahy
somaliland waxay soo martay 2 halgan o gobo nimo doon ah. Mid wuxu ahaa halgan siyasadeed midna wuxu ahaa halgan
hubaysan
halgankii lixdankii wuxu ahaa halgan siyasadeed
Halgankii SNM wuxu ahaaa halagan hubaysan o ka dagalamaya dad ladulmiyay, dhalan rogay, xasuuqay oo la dabar
goynayo
maantana waynu la soconaa dadkii aynu masuulka uga dhignay hogaanka dalka inaYy qiil ka dhigteen. SNM qabiil bay ahyd
oo waxay u dagaalamaysay qabiil.
SNM Qabiil may ahyn qabiilna umay dagalamayn.
Dadka taa qiilka ka dhigtaa laba siyaabood bay u fasiraan mar dhowr rerood o somaliland ka mid ah bay SNM ku
tilmaaamaan marna rer bay kusii tilmamaaan. Qolada leh SNM isaaq bay ahyd waxan leehay Cabdi rahman aw cali farah ma
isaaq buu ahaa se SNM maxa ku daray hadaanu somalilandnimo u dagalamyn iyo dadkiisan la xasuuqayo ka dagalamyn
Qolada tidhaaahda SNM waxay ahyd reer siilaaanyo waxan u sheegaya siyad bare wuxu yidhi
"Isaaq inta kale waan ka gar daranahy ee H/jeclo maxa ka maqan" taas oo macneheedu yahy laba nin baa golaha kacanka
kaga jiray & wasiiro ee may idayaaan
taasi waxay ku cadaynaysaa inay SNM ka koobnayd dhaman gobolada somaliland haloogu kalabato sidii loogu kala
damqashada badna /wadanisana ,
waxa jiray laba walaalo ah o nina SNM yahy nina faqash taan waxa sababay ninkastoo calooshii u shaqayste/bilaa damiir ah
wuxu galay faqash kuwaana waxa u badnaa dhamaaan xukumada manta min M/weyne ila agasimo oo ah mafiye isku
bahaysatay dulmiga tacadiga iyo tirtirida tariikhda dalka iyo dadkaba
Maanta miyaynu aqbalaynaa wasirkii dhamaaa ee wax barashadu inu yidhaahdo .
1)War uma hayo waxa lagu qoray iyo waxalaga bedelay
2) uniceff ba u xil saran dabacad manhajka
3) shan bayj banu ku soo urinay T/SNM
4) SNM hanoo keento tariikhdeedii anagu ma haynee
5) manhajka waxa lala mideeyya somalia
waxasi wa waxaynu ka dagalanay somaliland manta hadii ay weli manhaj lawadaagayso somalia ta macneheedu waa inay
weli tahay gobol ka tirsan somalia
masuuliyeentena manta kamaynu sugayn inay yidhahdan somaliland iyo somalia waa isku manahaj e waxanu idinka
sugaynay inad dalka lacagta wada gadhsiisaan oo ti siyad kabedeshan qaramada midoobayna ku amartaan inay ergey gaar
ah usomagacawdan somaliland nin aan waraq/vise ama codsi aan ka helin somaliland na aanu iminkarin dalka
lakiin taasi waxay noqotay "Ruux haraadani dhalanteed roob mood"
waxaan leeyahy dalkan waxa ka taliya maafiya is urursatay oo aan qabiil iyo gobol ay metelaan jirin
waxan kula talinaya xisbiga udub inaya dantooda ka hor mariyaan danta umada, qaranka ayna iska dayan wax ka sheegista
halyayada dalka iyo mujahidiinta
BY: Moha'edbashe Ibrahim Yusuf
Kuala-lampur Malaysia

Top